بلوچستان نا بدامنی ’’آجوئی نا جنگ‘‘ اف بلکن زرگزرانی شونداری نا برخلاف دہشت گردی ءِ، طلال چوہدری

اسلام آباد۔ 03 فروری (اے پی پی) وزیر مملکت داخلہ طلال چوہدری دوٹوک لوز آتیٹی پیدوارکرینے کہ بلوچستان اٹی برجاکارروائی ہچ ءُ حالیت اسے ٹی ’’آجوئی نا جنگ‘‘ اف بلکن پاکستان ءِ زرگزرانی وڑاٹ نزور کننگ نا سازش ءِ، بی ایل اے و ایلو دہشت گرد تنظیمک اسہ خاص ءُ مسخت اسے کن بدامنی تالان کننگ ءُ، اوفتا مسخت بیرہ پاکستان ءِ ڈی سٹیبلائز کننگ و جندی فائدہ دوئی کننگ ءِ، ہراٹی مخلوق  آن بھتہ ہلنگ، لُٹ و پل  کننگ و اسمگلنگ کون آکاروبار آ تینا اجارہ داری ءِ قائم کننگ اوار ءِ۔سے شنبے نادے آ قومی اسمبلی ٹی بلوچستان اٹی ساڑی آ دہشت گردی نا ریسہ غا برجا شرہ نا ورندی ءِ ترسا وزیر مملکت طلال چوہدری پارے کہ بلوچستان معدنیات آن شُپ ءِ، بیرہ چاغی ٹی 5 ارب ڈالر نا زرکاری بناکرینے، ریکوڈک کون  آ ڈٹ آتا 50 درسد کٹیا براہ راست بلوچستان ءِ ملک، دہشت گرد آتا اصل مسخت دا شونداری ءِ توننگ و ننا اسٹریٹجک پارٹنر چین ءِ سی پیک آن مر کننگءِ۔ وزیر مملکت اپوزیشن و قوم پرست جماعت آتا ’محرومی‘ نا بیانیہ ءِ مسترد کرسا حساب وکتاب پیش کرسا پارے کہ این ایف سی ایوارڈ اٹی بلوچستان نا فی کس بشخ پنجاب آن 40درسد زیات ءِ، بنجائی پی ایس ڈی پی ٹی غٹ آن  بھلا بشخ بلوچستان ناتخنگک۔ اوپارے کہ پاکستان نا قیام نا وخت بیرہ 114 اسکول ئسر، اینو15600 آن زیات ءُ ، ہموتم اسہ ہم یونیورسٹی یا میڈیکل کالج اس الوکہ، اینو 12 یونیورسٹی و 5 میڈیکل کالج ءُ، مچ آ پاکستان اٹی غٹ آن زیات 13 کیڈٹ کالج بلوچستان اٹی ءُ۔ اوسوج ہرفے کہ اگہ دا حق انا جنگ ءِ تو دہشت گرد لس بندغ نا آسراتی کن جوڑ مروک اسکول ، ہسپتال ، بینک، ریلوائی و ہائی وے تے انت اکن شست کیرہ؟ دا حق انا جنگ اف بلکن حق آ ڈاکہ ءِ۔ بے گوا بندغ آتا باندات آ ہیت کرسا اوپارے کہ پاکستان اٹ بے گوا بندغ آتا کچ ایلو ملک آتا مقابلہ ٹی بھاز کم ءِ و کمیشن تون 2500 آن ہم کم کیس ءُ۔ اوپارے کہ مخلوق تینٹ ڈوہ انا سوب آن روپوش مرسا مش تیا کارہ و اودے ’مسنگ پرسنز‘ نا پن ترسا ریاست ءِ بدنام کننگک۔ اپوزیشن نا تنقید نا ورندی ءِ ترسا طلال چوہدری پارے کہ وزیر داخلہ محسن نقوی  ہمووخت آ کوئٹہ نا گلی تیٹی ساڑی ئس ہراتم آپریشن چلینگاکہ ، اوفرنٹ لائن آ ہنسا فورس آتا است بڈی ءِ کرے۔ جعفر ایکسپریس کون آ است ہسون واقعہ غان دمدستی پد وزیراعظم و عسکری سرکڑدہ غاک کوئٹہ غا سرمسر، غٹ سیاسی سرکڑدہ غاتے ان کیمرہ حوال تننگا و غٹ ءِ پت اٹی ہلنگا ۔ طلال چوہدری پارے کہ ریاست تینا رٹ آ ہچ ءُ سمجھوتہ اس کپک و غٹ سیاسی جماعت آتے دا قومی ویل آ یکجا مرسا دشمن نا عزم ءِ بے سہب کروئی مریک۔