وزیراعلیٰ بلوچستان میر سرفراز بگٹی پولیو تور مہم نا بناءِ کرے

کوئٹہ ۔ 03 فروری (اے پی پی) وزیراعلیٰ بلوچستان میر سرفراز بگٹی مچ آ صوبہ ٹی پولیو تور مہم نا باضابطہ بناءِ کرے۔ سے شنبے نادے آ وزیراعلیٰ بلوچستان میر سرفراز بگٹی وزیراعلیٰ سیکرٹریٹ اٹی چناتے پولیو نا پڑی کنفسا باقاعدہ پولیو مہم نا بناءِ کرے۔ داوخت آ اسمبلی نا باسک انجینئر زمرک خان اچکزئی، برکت علی رند، عبیداللہ گورگیج، سنجے کمار، سیکرٹری جا ن جوڑی مجیب الرحمان پانیزئی، ایمرجنسی آپریشن سینٹر بلوچستان نا کوآرڈینیٹر انعام الحق و ایلوفک ہم ساڑی ئسر۔ وزیراعلیٰ بلوچستان میر سرفراز بگٹی پارے کہ دا قومی مہم اٹی جم وڑاٹ 11 ہزار ٹیمک بشخ ہلنگ ءُ ہرافتے ٹی 822 فکسڈ و 474 ٹرانزٹ ٹیمک ہم اوار ءُ ہرا صوبہ نا چندی علاقہ غاتیٹی خذمت سرایترہ تانکہ ہر چنااسکان رسینگ ءِ پک کننگ مرے۔ میر سرفراز بگٹی پارے کہ تدوک آ 15 تُو اٹی بلوچستان اٹی پولیو نا ہچءُ کیس اس رپورٹ متنے ہرا انسداد پولیو گام گیج آتا سرسہبی نا پیدوار شاہدی ءِ۔ اوپارے کہ بلوچستان نا 32 ضلع غاتیان بیرہ اِر اعلاقہ غاتا چاگڑدی وڑتیٹی پولیو دین خننگانے وخت اس کہ صوبہ نا 93 درسد علاقہ غاتا چاگڑد آن پولیو دین چٹانے۔ وزیراعلیٰ بلوچستان پارے کہ سال 2025 اٹی بلوچستان اٹی پولیو دین نا چٹفنگ نا بابت نمان سرسہبی دوئی کننگا وخت اس کہ ساڑی آ سال چاگڑدی کہول آپولیو نا پورو چٹفنگ کن بھازاہم ءِ۔ اوپارے کہ سالِ رفتہ آنبار 2026 اٹی ہم منظم و  گچین مہم نا کمک اٹ ہر چنااسکان رسینگ ءِ پک کننگک۔ میر سرفراز بگٹی خبڑدار کرے کہ چناک بے وخت پولیو دین آن زہمی مننگ کیرہ و پولیو تور مہم دا لاعلاج ناجوڑی نا توننگ کن المی ءِ۔ اولمہ و باوہ غاتیا زور شاغا کہ او تینا چناتے المی پولیو نا پُڑی کنفر انتئے کہ پولیو مچ آ وئی نا معذوری نا سوب جوڑ مننگ کیک۔ وزیراعلیٰ بلوچستان پارے کہ چناتا جان جوڑی نا رکھ ننا غٹ انا اسیجائی زمواری ءِ و اگہ اسہ چناس ہم پولیو نا پڑی تیان محروم سلیس تو غٹ چناک خطرہ ٹی تمنگ کیرہ۔