بنجائی وزیر حوالکاری عطاء اللہ تارڑ قومی خبررساں ادارہ ایسوسی ایٹڈ پریس آف پاکستان نا دورہ

اسلام آباد۔ 03 فروری (اے پی پی) بنجائی وزیر حوالکاری عطاء اللہ تارڑ قومی خبررساں ادارہ ایسوسی ایٹڈ پریس آف پاکستان (اےپی پی ) نا دورہ ءِ کرے۔ داوخت آ وزیراعظم نا میڈیا کوآرڈینیٹر بدرشہباز و پرنسپل انفارمیشن آفیسر مبشرحسن ئسک ہم بنجائی وزیر حوالکاری تون اوار ئسر۔ بنجائی وزیر حوالکاری ءِ قومی خبررساں ادارہ نا گرج و مسخت، تنظیمی پنجر و کسبی زمواری تا بارواٹی معلومدار کننگا۔ داوخت آ بنجائی وزیر حوالکاری و شینکاری عطاء اللہ تارڑ ءِ اے پی پی نا جم کارکڑد، ڈیجیٹل حکمت عملی و آخبت نا لائحہ عمل نا بارواٹی جوان حوال ہم تننگا، اے پی پی نا ڈیجیٹل ساڑی گری ءِ پین گچین و گیشتر جوڑ کننگ ، ادارہ ءِ پوسکن آخواست آتون ہم گرنچ کننگ و اسٹریٹجک بیانیہ سازی ٹی اے پی پی نا کڑد آ سرجمی اٹ گپ وتران مس وخت اس کہ سوشل میڈیا پلیٹ فارمز نا گچین کاریم اٹ اتنگ، ڈیجیٹل آؤٹ ریچ اٹی ودکی و علاقائی زبان تیٹی خبر آتا مون آ دننگ آ خصوصی چکار تننگ آ امنا کننگا۔ بنجائی وزیر حوالکاری اے پی پی نا ایلو جہانی نیوز ایجنسی تتون کروک آ معاہدہ غاتیان گچین وڑاٹ فائدہ ہرفنگ نا گرج آ زور شاغا و پارے کہ دا رابطہ غاتے پاکستان نا مثبت و نرم تشخص نا مون آ دننگ و قومی بیانیہ نا گچین ابلاغ کن پبی وڑاٹ کاریم اٹ اتنگے۔ بنجائی وزیر حوالکاری و شینکاری عطاء اللہ تارڑ پارت کرے کہ علاقائی بولی تیٹی خبر آتا مواد نا فراوانی ءِ شیفکو کہول اسکان پک کننگے۔ اوپارے کہ اے پی پی نا بلوچی، براہوئی، سندھی، پشتو، سرائیکی نیوز سروس آتا رداٹ تیارکروک مواد آتا پبی تشہیر آن السی پت اٹی پین ودکی مریک، علاقائی بولی تیٹی آب اٹ مواد آتا اشاعت ریاستی بیانیہ ءِ سوگو کننگ اٹ کمکار مریک۔ بنجائی وزیر حوالکاری مون آ بروک میڈیا رجحان آتون ہم گرنچ مننگ و اے پی پی نا ڈیجیٹل لائخی تیٹی ودکی نا گرج آ زور شاغا۔ بنجائی وزیر حوالکاری منیجنگ ڈائریکٹر محمد عاصم کھچی نا ادارہ ٹی شفافیت ءِ پک کننگ نا کوشست آتا ستاءِ کرساپارے کہ کرپشن نا برخلاف ایم ڈی اے پی پی نا گام گیج ستاکڑزک۔ بنجائی وزیر حوالکاری انتظامیہ نا کنڈآن کرپشن نا برخلاف سخت گام گیج آتا پورو مخ تفی نا درشانی ءِ کرے۔ اوپارے کہ اے پی پی کرپشن کیس انا عدالتی کارروائی و ٹرائل آ خڑکی نظر تخنگے۔ بنجائی وزیر حوالکاری اے پی پی بورڈ آف ڈائریکٹر نا دیوان ءِ اولیتی بنداوتیا اڈتننگ کن المی پارت ہم جاری کرے۔ داوخت آ منیجنگ ڈائریکٹر اے پی پی محمد عاصم کھچی ادارہ نا جم کارکڑد و آخبت نا لائحہ عمل آن ہم معلومدار کرے۔