بنجائی وزیر خزانہ نا سٹی بینک انا ڈل اتون اوڑدہی، پاکستان نا جہانی بانڈز انا ساڑی آ کارکڑد و پیشن نا وام تا حکمتِ عملی آ گپ وتران

اسلام آباد۔ 03 فروری (اے پی پی) بنجائی وزیر خزانہ و محصولات سینیٹر محمد اورنگزیب تون وزارت خزانہ نا ٹیم اتون اوار سے شنبے نادے آ سٹی بینک انا ڈل اوڑدہی کرے۔ ڈل انا کماشی ءِ سٹی بینک انا کنٹری آفیسر حبیب یوسف کریکہ، وخت اس کہ علی نثار رضوی(کارپوریٹ بینکنگ ہیڈ) و اسامہ پراچہ (وائس پریذیڈنٹ ، کارپوریٹ بینکنگ ) ہم اوڑتون اوار ئس ۔ اوڑدہی ٹی وتواجہ فنانسنگ نا چندی گمان تیا گپ وتران کننگا و حکومتِ پاکستان و سٹی بینک انا نیام اٹ کمکاری نا گمانی بشخ آتا جاچ ءِ ہلنگا۔ وزارتِ خزانہ نا ہمو کور ٹیم ہم دیوان اٹی ساڑی ئس ہرا وام تا نظم ونسق ، کیپٹل مارکیٹس و زیر شرہ ایلو پالیسی امور نا چاروکی ءِ کیک۔ دیوان اٹی وزارتِ خزانہ نا ٹیم ساڑی آ مارکیٹ حالیت و پاکستان نا پیشن فنانسنگ آؤٹ لک نا بابت اسہ بڑزکو کہولی جاچ اس پیش کرے۔ دیوان اٹی پاکستان نا جہانی بانڈز انا ساڑی آ کارکڑد و پیشن نا وام تا حکمتِ عملی آ گپ وتران مس، ہراٹی نہاد آتا تعین، مارکیٹ ٹائمنگ ، و دا ہیت آ زور شاغنگا کہ آخبت ہر لین دین ءِ وام تا پائیداری و خڑچ انا بابت جم ہدف آتا بایدے رداٹ مرے۔ وزارتِ خزانہ نا ٹیم سٹی بینک انا ڈل ءِ وتواجہ فنانسنگ پروگرام تیا برجاحکومتی گام گیج آتیان معلومدار کرے، ہرافتے ٹی نیامی مد انا نوٹ (Medium-Term Notes)نا پنجر آتیا بنائی تیاری اوار ءِ۔ ولے داہم پیدوار کننگاکہ فی الوخت چکار ہمو اولیتی لین دین نا پوروی آ ٹی ءِ ہرا داوخت آ عمل نا ریسہ غاتیٹی ءِ۔ پاننگاکہ تہہ نا منظوری و ساختی تیاری ناعمل ءِ پورو کننگانے ومارکیٹ آن عملی وڑاٹ رجوع کننگ نا فیصلہ جوان انگا وخت، مارکیٹ حالیت و نہاد آتا خواست آتے مون آتخسا کننگک۔