بنجائی وزیر خزانہ تون سلاہکار خزانہ خیبرپختونخوا نا اوڑدہی، مالی و شونداری امور آ گپ وتران

اسلام آباد۔ 03 فروری (اے پی پی) بنجائی وزیر خزانہ ومحصولات سینیٹر محمد اورنگزیب تون سے شنبے نادے آ وزارت خزانہ ٹی وزیراعلیٰ خیبرپختونخوا نا سلاہکار خزانہ مزمل اسلم اوڑدہی کرے۔ اوڑدہی ٹی وزارتِ خزانہ وحکومتِ خیبرپختونخوا نا سینئر کمامدارآک ہم بشخ ہلکر۔ اوڑدہی ٹی مالی و شونداری امور نا بابت چندی باندات آتیا گپ وتران کننگا، ہرافتے ٹی ضم مروک ضلع غاتیکن شونداری مدات آتا رداٹ فنڈ آتا وخت آ جاری کننگ، عارضی وڑاٹ بے اُرا مروک آ بندغ آتا بحالی و کمکاری نا بابت سلوک آ پیسہ، و صوبائی حق و وسیلہ غاتا بشخنگ نا جم فریم ورک ، بشمول نیشنل فنانس کمیشن (این ایف سی) نا بابت امور اوار ئسر۔ خیبرپختونخوا نا ٹیم ضم مروک ضلع غاتیٹی انتظامی و شونداری گرج آتے مون آتخا و برجاڈٹ آتا چرجوئی و ڈغاری کہول آ دمدستی گرج آتے پورو کننگ کن فنڈ آتا وخت آ و قابل پیش گوئی جاری کننگ نا اہمیت آ زور شاغا۔ اوبے اُرا خاہوت آتا بابت واجب الادا زمواری و ایلو تعلقدار امور نا ہم پیدواری ءِ کرے ہرافتے کن گچین رابطہ کاری و دمدستی ایسر درکارءِ۔ بنجائی وزیر خزانہ و محصولات خیبرپختونخوا نا ڈل انا کنڈآن چست کروک امور ءِ جوانی اٹ بِنگ و بنجائی حکومت نا کنڈآن صوبہ غاتون تین پہ تینی کمکاری آ تالان وفاقیت و تعمیری رابطہ نا عزم انا درشانی ءِ کرے۔ اوخیبرپختونخوا نا ٹیم ءِ باوری کرفے کہ وزارتِ خزانہ این ایف سی و دیوان اٹی شرہ ٹی بروک آ ایلو تعلقدار مدات آتا رداٹ صوبہ نا روا مالی حق و واجبات آتا دوئی کننگ کن، مروجہ قاعدہ ، طے مروک فریم ورک و کانودی خواست آتا رداٹ ، پورو کمک فراوان کیک۔ بنجائی وزیر داہیت آ زور شاغا کہ فنڈز آتا شفاف و آوار جاری کننگ کن گچین رابطہ کاری و ہراڑے المی مرے وخت آ حسابات نا تطبیق بھاز اہم ءِ ، و داہیت انا پیدواری ءِ کرے کہ بنجائی حکومت خیبرپختونخوا خاص کر ضم مروک ضلع غاتے مون تروک یکتا شونداری و سیکورٹی چیلنج آتیان جوانی اٹ معلومدار ءِ۔