کشاری بشخ اٹی ہدفی زرکاری آن فوڈ سسٹم اٹی بدلی المی ءِ، بنجائی وزیر رانا تنویر حسین

اسلام آباد۔ 03 فروری (اے پی پی) بنجائی وزیر قومی غذائی رکھ و پٹ وپول رانا تنویرحسین پارینے کہ کشاری بشخ اٹی ہدفی زرکاری آن فوڈ سسٹم اٹی بدلی المی ءِ، زیتون و ڈیری سیکٹر روزگار و غذائی رکھ اٹی اہم ءُ کڑد اس ادا کننگ کیرہ، ایف اے او کانفرنس کشاری زرکاری نا مون آ دننگ اٹ اہم مزل نا نشان  جوڑمریک، پبی نتیجہ و بامعنی زرکاری نا دوئی کننگ کن اسیجائی کوشست المی ءِ۔ داخیال آتا درشانی ءِ او سے شنبے نادے آ اسلام آباد نا ہندی ہوٹل اٹی ایف اے او نا کنڈآن ہینڈاِن ہینڈ نیشنل ایگریکلچر انویسٹمنٹ سمٹ 2026 آن بطورمہمان خاص تران کرساکرے۔ بنجائی وزیرپارے کہ حکومتِ پاکستان زیتون و ڈیری نا بشخ آتے اولیتی بنداو تیا مون آدننگ ءِ انتئے کہ داہڑتوم آ بشخ آک غذائی رکھ، روزگار نا وارخواہی و برآمد آتیٹی ودکی نا پبی لائخی تخرہ۔ اوپارے کہ زیتون نا بشخ کنوئی آ تیل انا درآمد آتیٹی سالانہ 3 ارب ڈالر اسکان کمتی نا لائخی تخک، ولے ویلیو چین نا کمتی نا سوب آن دا صنعت داوخت آ تالان مسنے ہرادے سوگو زرکاری نا کمک اٹ سوگو کننگ مریک۔ رانا تنویرحسین پارے کہ ڈیری سیکٹر اٹی پاکستان دنیا نا پنچ می بھلا پال ودی کروک آملک ءِ ولے انفراسٹرکچر و سرٹیفکیشن آسراتی نا کمتی نا سوب دا بشخ انا پورو کچ آن فائدہ ہرفپننگ انگ ءِ۔ اوپارے کہ ویلیو ایڈیڈ ڈیری مصنوعات آتیٹی برآمدات آتا گیشتر وارخواہی ساڑی ءِ ہرافتے ٹی نہادی زرمبادلہ دوئی کننگ مریک۔ بنجائی وزیر پارے کہ زیتون و ڈیری ہڑتوم آ بشخ آک خلقی زرگزران نا سوگوی، روزگار نا مون آدننگ و غذائی رکھ انا دوئی کننگ اٹ اہم ءُ کڑد اس ادا کننگ کیرہ۔ اوایف اے او نا کنڈآن اڈ ہلوک دا کانفرنس ءِ کشاری زرکاری نا مون آ دننگ کن اسہ اہمءُ مزل نا نشان اس گوندا۔ اوباوری کرفے کہ وزارتِ قومی غذائی رکھ و پٹ وپول، ایف اے او تون پورو کمکاری ءِ برجاتخک و حکومت، نجی بشخ و زرکار آک اواری اٹ کشاری بشخ ءِ مون تروک چیلنج آتا عملی ایسر اس پٹرہ۔ بنجائی وزیر زرکارآتیا زور شاغا کہ او زیتون و ڈیرہ نا بشخ آتیٹی مون آ برسا کڑد ادا کیر تانکہ پبی نتیجہ و بامعنی زرکاری نا کمک اٹ ملکی زرگزران و فوڈ سسٹم ءِ سوگو جوڑ کننگ مرے۔