چیئرمین سینیٹ پاکستان سید یوسف رضاگیلانی نا کمبوڈیا نا سرکاری دورہ، ہڑتوم آ کنڈآتا کمکاری و تین پہ تینی فائدہ غاتیا سرجمی اٹ گپ وتران

نوم پنہہ۔ 03 فروری (اے پی پی) چیئرمین سینیٹ پاکستان، سید یوسف رضاگیلانی بڑزکو کہولی پارلیمانی ڈل اتون اوار کمبوڈیا نا سرکاری دورہ ءِ کرے، ہرادے پاکستان وکمبوڈیا نا نیام اٹ پارلیمانی سفارتکاری، ہڑتوم آ کنڈآتا تعلقداری و تین پہ تینی کمکاری نا مون آ دننگ اٹ اہم ءُ مزل نا نشان اس گوندنگ انگ ءِ۔ سینیٹ سیکرٹریٹ نا کنڈآن جاری بیان نا رداٹ دورہ ٹی چیئرمین سینیٹ سید یوسف رضاگیلانی و کمبوڈیا نا سینیٹ نا صدر سامد ایچ اکاموہا سینا پدیئی تیچوہن سین نا نیام اٹ بڑزکو کہولی ہڑتوم آ کنڈآتا اوڑدہی اس مس، ہراٹی تین پہ تینی است خواہی نا اہم امور آ سرجمی اٹ گپ وتران کننگا۔ اوڑدہی ٹی پارلیمانی کمکاری ءِ پین سوگو کننگ، ہڑتوم آ کنڈآتا تعلقداری تے پوسکن ءُ جہت اس تننگ، سیاسی، زرگزرانی و السی کہول آ رابطہ غاتا مون آ دننگ، وخت اس کہ واپار، زرکاری و ادارہ جاتی کمکاری نا گمان تیا ہم گپ وتران کننگا۔ چیئرمین سینیٹ سید یوسف رضاگیلانی نا دا دورہ پاکستان وکمبوڈیا نا نیام اٹ متکن آ دوستانہ تعلقداری تے پین سوگو کننگ، پارلیمانی رابطہ غاتے ودفنگ و تین پہ تینی کمکاری نا پوسکن ءُ کسر پٹنگ نا اسیجائی عزم انا عکاسی ءِ کیک۔ داکان بیدس، چیئرمین سینیٹ سید یوسف رضاگیلانی بڑزکو کہولی پارلیمانی ڈل اتون اوار کمبوڈیا نا دارالحکومت پنوم پنہ غا سرمس، ہراڑے ٹیچو انٹرنیشنل بالی پٹ آ اودے جم وجوش اٹ بخیرکننگا۔ بیابخیرکروک آتیٹی کمبوڈیا نا سینیٹ نا ارٹ میکو نائب صدر ڈاکٹر تھن وتھانا، سینیٹ نا اولیکو کمیٹی نا چیئرمین و کمبوڈیا۔ پاکستان سینیٹ فرینڈ شپ گروپ نا سروک انگی چانفال، پنچ می کمیٹی نا چیئرمین ڈاکٹر چھویی سیانگ، ڈائریکٹر جنرل پروٹوکول و جہانی تعلقداری انگیون سوک وینگ، و کمبوڈیا ٹی پاکستان نا سفیر ظہیر الدین بابر تھیہم ئسک اار ئسر۔ دورہ ٹی چیئرمین سینیٹ انڈیپنڈنس مونومنٹ نا دورہ ءِ کرے، ہراڑے او کمبوڈیا نا قومی ہیروتے خراج عقیدت پیش کرسا پھل شاغا و کمبوڈیا نا آجوئی و قومی جہد نا ستاءِ کرے۔ اوکان پد، اوآنجہانی کنگ فادر پریاہ بوروم رتناک کاؤدھ نا شاہی یات گاری مجسمہ غاہم حاضری تس و پھل آتا چادر اس شاغا، ہرا کمبوڈیا نا تاریخ، دودوربیدہ و قومی میرات کن پاکستان نا شرف نا چیدہ ءِ۔