بنجائی وزیر جام کمال خان تون ازبکستان نا زرکاری، صنعت وواپار نا وزیر لازیز قادر توف نا اوڑدہی

اسلام آباد۔ 03 فروری (اے پی پی) بنجائی وزیر واپار جام کمال خان تون ازبکستان نا زرکاری، صنعت و واپار نا وزیر لازیز قادر توف سے شنبے نادے آ اسلام آباد اٹی اوڑدہی کرے۔ اوڑدہی ٹی ہڑتوم آکنڈآتا اقتصادی کمکاری ٹی پیش رفت نا جاچ ءِ ہلنگا و واپار ، زرکاری، رابطہ و سیکٹرل پارٹنر شپ ءِ ترند کننگ کن عملی گام گیج آتیا امنا کننگا۔ ازبک ڈل ءِ بخیرکرسا بنجائی وزیر پارے کہ پاکستان۔ ازبکستان نا نیام اٹ پدریسہ بڑزکو کہولی رابطہ و ادارہ جاتی فالواپ نا کمک اٹ تدوک آاِراسال آتیٹی نمان وڑاٹ ترندی بسنے۔ ازبک وزیر ڈل انا دورہ کن مہمانداری و بست وبند آتیا پاکستان نا منت واریءِ ہرفسا پارے کہ ہڑتوم آ فریق ازبکستان آن بروک آ اسہ اہم بڑزکو کہوی دورہ سے نا تیاری کننگ ءُ۔ اوواپاری ٹک آتیٹی گچینی ءِ مون آتخساپارے کہ ہڑتوم آکنڈآتاواپار اٹی تدوک آ سال کم وود 10 درسد ودکی مسنے، پاکستان آن ازبکستان نا درآمدآتیٹی کم وود 12 درسد ودکی مسنے، وخت اس کہ پاکستان ءِ ازبک برآمد آتیٹی کم وود 8 درسد ودکی مسنے۔ او کڑمب صنعتی کمکاری و پوسکن آبشخ جاتی کمکاری نا کمک اٹ ہڑتوم آ کنڈآتا واپار اٹی 2 ارب ڈالر نا ہدف مقرر کرسا واپار اٹی توازن وکچ انا گرج آ زور شاغا۔ ازبک فریق اولیتی واپاری فریم ورک آ تعمیری مذاکرات نا ستاءِ کرے، بشمول مصنوعات آتا کوریج نا لڑ ءِ 34 آن 92 اسکان ودفنگ، و وخت اتون اوار اوار خذمت و زرکاری نا کنڈآن بست وبند آتیٹی کمکاری ءِ گیشتر کننگ اٹ است خواہی نا درشانی ءِ کرے۔ ازبک وزیرپارے کہ داوخت آ ازبکستان اٹی 228 پاکستانی کمپنی کاریم کننگ ءُ و بیرہ تدوک آ سال ہموڑے 80 پوسکن ءُ کمپنی رجسٹر مسر۔ ہڑتوم آ فریق آک اولیتی بشخ بشمول فوڈ سیکورٹی ، کانڑکنی، ٹیکسٹائل، سِل و فارماسیوٹیکل اٹی شریداری ءِ ودفنگ آ گپ وتران کریر۔ ازبک وزیر پارے کہ ازبک کمپنیک پاکستان اٹی ہم زرکاری و ڈٹ آتے پٹنگ نا خواہندار ءُ ہرافتے ٹی خور انا رکھ و سُو انا پیداوار، برنج نا دسنگ نا وارخواہی و کانڑکنی اوار ءِ۔ ہڑتوم آ فریق آک الس تون الس و کاروباری رابطہ غاتیٹی مثبت رفتار نا ہم جاچ ءِ ہلکر، دُوارہ بناکروک و براہ راست فضائی رابطہ غاتے ودفنگ نا خیرمقدم ءِ کریر۔