چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر تون لیبیا نا عرب سلہہ بند فوج انا کمانڈر انچیف فیلڈ مارشل خلیفہ ابوالقاسم حفتر نا اوڑدہی

راولپنڈی۔ 02 فروری (اے پی پی) چیف آف آرمی اسٹاف و چیف آف ڈیفنس فورسز (سی ڈی ایف) فیلڈ مارشل سید عاصم منیر تون لیبیا نا عرب سلہہ بند فوج انا کمانڈر انچیف فیلڈ مارشل خلیفہ ابوالقاسم حفتر لیبیا نا عرب سلہہ بند فوج انا ڈپٹی کمانڈر انچیف لیفٹیننٹ جنرل صدام خلیفہ حفتر تون اوار جنرل ہیڈ کوارٹرز (جی ایچ کیو) ٹی اوڑدہی کرے ہراٹی ہڑتوم آ کنڈآن تین پہ تینی است خواہی نا امور خاص کر تعلقدار ڈیہہ آتیٹی سیکورٹی نا حالیت و کسبی کمکاری آ گپ وتران کننگا۔ آئی ایس پی آر نا رداٹ گپ وتران اٹی پاکستان و لیبیا نا سلہہ بند فوج انا نیام اٹ پدریسہ رابطہ و کمکاری نا اہمیت آ زور شاغنگا۔ فیلڈ مارشل سید عاصم منیر شرفمند آ مہمان تے بخیر کرے و لیبیا تون ہڑتوم آ کنڈآتا تعلقداری تے پین سوگو کننگ نا پاکستان نا عزم انا درشانیءِ کرے۔ اولیبیا ٹی امن، سوگوی و ادارہ جاتی شونداری کن پاکستان نا مخ تفی نا ہم درشانی ءِ کرے۔ اوڑدہی دوستانہ و خوشگوار چاگڑد اٹی مس ہرا پاکستان ولیبیانا نیام اٹ متکن آ برادرانہ تعلقداری تا ڈیک ءِ۔ داکان مست نور خان ایئر بیس آ سرمننگ آ فیلڈ مارشل سید عاصم منیر فیلڈ مارشل خلیفہ ابوالقاسم حفتر ءِ بخیرکرے۔ شرفمند آ مہمان جی ایچ کیو ٹی یات گار شہداء آ حاضری تس ، پھل آتا چادر اس شاغا و شہید آتے خراج عقیدت پیش کرے۔