وزیراعظم شہباز شریف تون ڈائریکٹر جنرل یونیسکو ڈاکٹر خالد الاینانی نا اوڑدہی

اسلام آباد۔ 02 فروری (اے پی پی) وزیراعظم محمد شہباز شریف جوان و آب اٹ تعلیم نامون آدننگ، دودوربیدہ ئی میرات آتا رکھ و جہانی چیلنج آتون مون تننگ نالائحہ عمل ءِ سوگو کننگ کن یونیسکو نا بنداوی قدر انا پاسداری کن پاکستان نا عزم انا درشانی ءِ کرینے۔ وزیراعظم محمد شہباز شریف تون اقوام متحدہ نا تعلیمی، سائنسی و دودوربیدہ ئی تنظیم (یونیسکو) نا ڈائریکٹر جنرل ڈاکٹر خالد الاینانی دوشنبے نادے آ داڑے اوڑدہی کرے۔ بنجائی وزیر تعلیم و کسبی تربیت ڈاکٹر خالد مقبول صدیقی، وزیر سائنس و ٹیکنالوجی خالد حسین مگسی، وزیر قومی میرات و دودوربیدہ ارنگزیب کھچی و بڑزکو کمامدارآک ہم اوڑدہی ٹی ساڑی ئسر۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم ڈاکٹر خالد الاینانی ءِ ڈائریکٹر جنرل یونیسکو گچین مننگ آمبارکبادی ترساجوان و آب اٹ تعلیم نا مون آدننگ، دودوربیدہ ئی میرات نا رکھ و جہانی چیلنج آتون مون تننگ کن لائحہ عمل ءِ سوگو کننگ نا بابت یونیسکو نا بنداوی قدر انا پاسداری نا پاکستان نا عزم انا درشانی ءِ کرے۔ وزیراعظم یونیسکو نا اہم کڑد انا ستاءِ کرسا ڈاکٹر خالد الاینانی نا قابل سرکڑدہ ئی ٹی تنظیم تون کمکاری ءِ برجاتخنگ نا پاکستان نا است خواہی نا درشانی ءِ کرے۔ وزیراعظم تعلیم نا مون آدننگ کن حکومت پاکستان نا کنڈآن کروک آ چندی گام گیج خاص کر ’’ایجوکیشن ایمرجنسی‘‘ ہرانا مسخت اسکول آ ہِننگ نا وئی نا چناتا داخلہ غاتیٹی ودکی کون آگام گیج آتے مون آتخا۔ وزیراعظم بطور وزیراعلیٰ پنجاب تینا دور اٹی تعلیم نا بشخ اٹی دوئی کروک آزموندہ ، گچین وڑوڈول و سرسہبی تا ذکر ءِ ہم کرے۔ اوڑدہی ٹی وزیراعظم پاکستان اٹی دودوربیدہ ئی میرات نا 6 ہندآتا رکھ و داہیت اٹی یونیسکو نا کمکاری آ ہم است جمی نا درشانی ءِ کرے و یونیسکو ءِ کھیوڑہ سالٹ مائنز کون آ پین جاگہ غاتے دودوربیدہ ئی میرات اٹی اوار کننگ نا سلہ خلک۔ ڈائریکٹر جنرل یونیسکو جم وجوش اٹ بخیرآ وزیراعظم نا منت واری ءِ ہرفے و پارے کہ او تینا گونڈ دورہ ٹی چندی سکول و دودوربیدہ ئی ہند آتا دورہ ءِ کرے۔ اوتعلیم نا بشخ اٹی پاکستان نا سرسہبی تا ستاءِ کرے و تعلیم، سائنس و دودوربیدہ نا بشخ آتیٹی پاکستان ناکوشست آتا مخ تفی کن تینا پدریسہ عزم آ زور شاغا۔