پاکستان جان جوڑی نا بشخ اٹی خودانحصاری نا کنڈآ ترندی اٹ ہِننگ ءِ، بنجائی وزیر جان جوڑی

اسلام آباد۔ 02 فروری (اے پی پی) بنجائی وزیر قومی جان جوڑی سید مصطفیٰ کمال پارینے کہ پاکستان جان جوڑی نا بشخ اٹی خودانحصاری نا کنڈآ ہِننگ ءِ، ویکسین جوڑ کننگ اٹ خودکفالت نا قومی وژن ءِ عملی دروشم اس تننگ کن اہم پیش رفت مسنے۔ وزارت جان جوڑی نا کنڈآن جاری بیان اٹی اوپارے کہ ویکسین نا ہندی تیاری نا بابت سعودی عرب نا 11 باسکی بڑزکو کہولی ڈل (اینو) دوشنبے آ پاکستان آ سرمس۔ داپیش رفت بنجائی وزیر جان جوڑی مصطفیٰ کمال نا تدوک آہفت تُو آ تالان پدریسہ کوشست آتا نتیجہ ءِ۔ یات سلے کہ بنجائی وزیر جان جوڑی مصطفیٰ کمال نا تینا سعودی  ہم منصب تون داتم اسکان مسہ اہم اوڑدہی مسنے ہرافتے ٹی ویکسین نا ہندی تیاری، زرکاری و تکنیکی کمکاری کون آ اہم امور آ سرجمی اٹ گپ وتران کننگا۔ ویکسین نا ہندی تیاری نا بابت مصطفیٰ کمال نا سعودی عرب نا وزیر صنعت تون ہم اوڑدہی مسنے ہراٹی ویکسین مینو فیکچرنگ ، فارماسیوٹیکل انڈسٹری و صنعتی شریداری نا بشخ آتیٹی نمان پیش رفت مس۔ دا اوڑدہی تیٹی ہڑتوم آملک آتا کنڈآن فوکل پرسن مقرر کننگا۔ پاکستان نا کنڈآن چیف ایگزیکٹیو آفیسر ڈریپ ڈاکٹر عبید ءِ فوکل پرسن پن کننگا وخت اس کہ سعودی عرب نا کنڈآن وزارتِ صنعت نا سینئر ایڈوائزر نزار الحریری (Nizar Y. Al-Hariri)ءِ فوکل پرسن پن کننگا۔ ہندا چرجوئی ٹی پاکستان ڈرگ ریگولیٹری اتھارٹی (ڈریپ) نا چیف ایگزیکٹیو آفیسر و سعودی وزارتِ صنعت نا ایڈوائزر نا نیام اٹ داتم اسکان شش سرجمی اوڑدہی مسنے۔ بنجائی وزیر جان جوڑی مصطفیٰ کمال نا رداٹ بڑزکو کہولی سعودی ڈل انا دا دورہ ویکسین نا ہندی تیاری نا عمل ءِ عملی دروشم اس تننگ نا کنڈآ اسہ فیصلہ ئی گام اس پک مریک ۔ اوپارے کہ حکومت ہندی کہول آ ویکسین نا تیاری کن سنبرینگوک ءِ۔ اوپرے کہ ہندی کہول آ ویکسین نا تیاری نئے بیرہ ملکی گرج آتے پورو کیک بلک ودکی پیدوار نا کمک اٹ برآمدات آتے مون آ درسا قومی زرگزران ءِ ہم سوگو کیک۔ اوداعزم انا درشانی ءِ کرے کہ الس ءِ رکھوک و آب اٹ ویکسین نا فراوانی حکومت نا اولیت ءِ۔