وزیراعظم شہبا ز شریف تون جہانی بینک گروپ نا صدر اجے بنگا نا اوڑدہی

اسلام آباد۔ 02 فروری (اے پی پی) وزیراعظم محمد شہباز شریف پاکستان تون جہانی بینک گروپ نا مریس مدی شریداری و شونداری اولیت آتا مون آدننگ نا عزم انا ستاءِ کرساپارینے کہ حکومت پائیدار اقتصادی سوگوی نا دوئی کننگ کن جوان، کثیر الجہتی اصلاحاتی پروگرام آ تندہی اٹ عمل کننگ ءِ، اقتصادی شونداری و اصلاحات اٹی جہانی بینک گروپ نا کمکاری ءِ قدر انا نظر اٹ ہرک۔ داخیال آتا درشانی ءِ او جہانی بینک گروپ نا صدر اجے بنگا تون گپ وتران کرسا کرے ہرا دوشنبےنادے آ داڑے اوڑتون اوڑدہی کرے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم جہانی بینک گروپ نا صدر نا حیثیت اٹ اجے بنگا نا اولیکو سرکاری دورہ پاکستان آ اونا خیرمقدم ءِ کرے۔ وزیراعظم پاکستان تون جہانی بینک گروپ نا مریس مدی شریداری و ملک انا شونداری اولیت آتا مون آ دننگ کن اونا عزم انا ستاءِ کرسا خاص کر 10 سال انا جہانی بینک گروپ کنٹری پارٹنر شپ فریم ورک (سی پی ایف) نا رداٹ کمکاری ءِ ستاکڑزوک گوندا۔ وزیراعظم جہانی بینک گروپ ءِ پین گچین شونداری شریدار جوڑ کننگ اٹ اجے بنگا نا سرکڑدہ ئی نا ہم ستاءِ کرے۔ وزیراعظم پارے کہ حکومت پاکستان پائیدار اقتصادی سوگوی نا دوئی کننگ کن اسہ جوان، کثیر الجہتی و ملکی گرج آتا رداٹ جوڑ کروک آ اصلاحاتی پروگرام آ پورو تندہی اٹ عمل کننگ ءِ۔ وزیراعظم سوگو انفراسٹرکچر، کشاری کاروبار، ڈیجیٹل شونداری، توانائی ، انسانی وسیلہ، مالیاتی اصلاحات، روزگار نا وارخواہی و نجی زرکاری ٹی ودکی کن جہانی بینک گروپ نا کمکاری نا ہم ستاءِ کرے۔ وزیراعظم و اجے بنگا داہیت آ زور شاغار کہ کنٹری پارٹنر شپ فریم ورک اتون ہم گرنچ اولیت آتیا ترند رفتار عملدرآمد و گچین چاروکی ءِ پک کننگے تانکہ وخت آ وبھلو کچ اسے آ نتیجہ غاتے دوئی کننگ مرے۔ دا گام گیج شونداری ڈٹ آتیٹی عملدرآمد نا اڑاند آتا چٹفنگ کن وزیراعظم نا وژن نا پوروی ٹی کمکار مریک۔ وزیراعظم  دا عزم انا درشانی ءِکرے کہ حکومت ہندن ءُ جوان انتظامی اصلاحات اسے آ کاربند ءِ ہرا روزگار آ تالان اقتصادی شونداری ءِ مون آ دے و زرکارآتا پت ءِ پین سوگو کے۔ جہانی بینک گروپ نا صدر اجے بنگا پاکستان اٹ جم وجوش اٹ بخیر ومہمانداری آ وزیراعظم نا منت واری ءِ ہرفے۔ او حکومت پاکستان نا برجا اصلاحاتی کوشست آتا ستاءِ کرے ’’ون ورلڈ بینک گروپ‘‘ نا رداٹ کمکاری ءِ پین گہرا کننگ نا عزم انا درشانی ءِ کرے۔ اومستی پارے کہ حکومت نا اصلاحاتی ایجنڈانا ہدف آتا دوئی کننگ کن شونداری شریدار آتون خڑکی ہم گرنچی اتون اوار اوار نجی وسیلہ غاتا گچین کاریم اٹ اتنگ اٹ ودکی المی ءِ۔