بنجائی وزیر خزانہ نا زرگزرانی سوگوی، سوگو زرمبادلہ کوڑی و زرکارآتا پت ءِ ودفنگ نا حکومتی عزم انا درشان، وافی انرجی پاکستان نا کنڈآن 100 ملین ڈالر اسکان زرکاری نا عندیہ

اسلام آباد۔ 02 فروری (اے پی پی) بنجائی وزیر خزانہ ومحصولات سینیٹر محمد اورنگزیب دوشنبے نادے آ زرگزرانی سوگوی ءِ برقرار تخنگ، زرمبادلہ نا کوڑی تے سوگو کننگ و زرکارآتا پت انا مون آ دننگ کن حکومت نا عزم انا درشانی ءِ کرے۔ داہیت ءِ او وافی انرجی پاکستان لمیٹڈ نا ڈل اتون اوڑدہی ٹی پارے، ہرابروک آ اِرٹ آن مسہ سال آتیٹی پاکستان اٹی 100 ملین امریکی ڈالر اسکان گمانی زرکاری نا عندیہ تس۔ دااوڑدہی وزارتِ خزانہ ٹی اڈ ہلک، ہراٹی وافی انرجی پاکستان لمیٹڈ نا ڈل انا کماشی ءِ جاوید اختر، چیف فنانس آفیسر، اسیاڈ گروپ(بورڈ ممبر) ، وافی انرجی پاکستان لمیٹڈ ئسک کریر۔ ڈل اٹی زبیر شیخ، چیف ایگزیکٹیو آفیسر، و ضرار محمود، چیف فنانس آفیسر، وافی انرجی پاکستان لمیٹڈ ئسک ہم اوار ئسر۔ اوڑدہی ٹی کمپنی نا ساڑی آ سرجز، آخبت زرکاری نا گمان و آئل مارکیٹنگ و توانائی نا بشخ انا بابت امور نا جاچ ءِ ہلنگا۔ بنجائی وزیر خزانہ پارے کہ پائیدار زرگزرانی سوگوی حکومت نا اقتصادی حکمت عملی نا بنداوی تمبہ ءِ و زرکارآتا پت اکن المی ءِ۔ اوپارے کہ زرمبادلہ نا دوئی کننگ اٹی گچینی  جم زرگزرانی نظم وضبط و اصلاحات نا براہ راست نتیجہ ءِ، و پیشن نا مالیاتی کوڑی تے سوگو کننگ آن جاچ کاروباری لین دین، بشمول کٹیا نا پیشن نا ملک آ گدریفنگ و سرحد پار ادائیگی ٹی آسراتی دُوبریک۔ بنجائی وزیر داہیت انا مشاہدہ ءِ کرے کہ گچین مروک آ زرگزرانی ٹک آک ملکی و درملکی زرکارآتا پت اٹی ودکی نا سوب جوڑ مننگ ءُ، ہرا اسہ جان جوڑی زرکاری چاگڑد اسے نا بنداوی عنصر ءِ۔ اوداہیت آ زور شاغا کہ ہندی زرکار آتا شمولیت درملکی زرکاری نا مون آ دننگ اٹ اہم کڑد ادا کیک۔ اوڑدہی ٹی پبلک پرائیویٹ پارٹنر شپ ماڈلز و اسٹرکچرڈ فنانس آہم گپ وتران کننگا۔ بنجائی وزیر خزانہ پارے کہ صوبائی کہول آ سرسہب آزموندہ غاتے بھلو کچ اسے آ بنداوی پنجر نا ڈٹ آتیکن ان ماڈلز نا افادیت آتے ظاہر کیک، و اسٹرکچرڈ فنانس نا مون آ دننگ و بینکاری بشخ اتون سوگو شریداری نا گرج آ زور شاغا۔