امن و ایمنی کن صوبائی حکومت آتا کوشست آتے ودفنگ نا گرج ءِ، وزیراعظم شہباز شریف نا وزیراعلیٰ خیبرپختونخوا تون اوڑدہی ٹی گپ وتران

اسلام آباد۔ 02 فروری (اے پی پی) وزیراعظم محمد شہباز شریف خیبرپختونخوا نا الس نا شونداری و شونہالی کن بنجائی و صوبائی حکومت نا نیام اٹ کمکاری آ زور شاغسا پارینے کہ امن وایمنی کن صوبائی حکومت نا کوشست آتے پین ودفے۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف تون وزیراعلیٰ خیبرپختونخوا سہیل آفریدی دوشنبے نادے آ داڑے اوڑدہی کرے ہراٹی وزیراعظم خیبرپختونخوا نا الس نا شونداری و شونہالی کن بنجائی و صوبائی حکومت نا نیام اٹ کمکاری نا گرج آ زور شاغا۔ وزیراعظم صوبہ ٹی امن وایمنی کن بنجائی و صوبائی حکومت نا کمکاری ءِ المی گوندسا پارینے کہ امن و ایمنی کن صوبائی حکومت نا کوشست آتے پین ودفنگ نا گرج ءِ۔ وزیراعظم پارے کہ صوبائی حکومت انسداد دہشت گردی کن صوبائی ادارہ غاتے سوگو کے۔ وزیراعظم پارے کہ بنجائی و صوبائی حکومت دہشت گردی نا پورو چٹفنگ کن اسیجائی کوشست آتے برجاتخرہ۔ خیبرپختونخوا ٹی امن وایمنی و السی آسودہی کن صوبائی حکومت تینا آئینی زمواری تے پورو کے۔ اوپارے کہ صوبائی حکومت واکدار ءِ، جان جوڑی و تعلیم کن خیبرپختونخوا نا الس کن گام گیج کننگے۔ وزیراعظم پارے کہ بنجائی حکومت خیبرپختونخوا نا الس نا گچینی کن مدام کوشست کننگ ءِ، خیبرپختونخوا بنجانا اسہ اہم ءُ اکائی اسے، صوبہ نا الس نا شونہالی کن بنجائی حکومت تینا دنگ انارداٹ پبی کوشست آتے برجاتخک۔ وزیراعظم قومی شونداری و السی خذمت کن بنجا وصوبہ غاتا نیام اٹ خڑکی رابطہ و گچین رابطہ کاری ءِ المی گوندسا خیبرپختونخوا ٹی شونداری ڈٹ ، بنداوی پنجر نا گچینی، تعلیم، جان جوڑی و روزگار ناوارخواہی تے ودفنگ کن بنجائی دنگ انا رداٹ کمکاری نا باوری کرفے۔ اوپارے کہ بنجائی حکومت غٹ صوبہ غاتون اوار ہِننگ و اسہ وڑشونداری نا وژن آ عمل کننگ ءِ۔ تین پہ تینی سلابت و شریداری عمل نا کمک اٹ قومی یکجہتی ، سوگوی و شونہالی نا ہدف آتے گچین وڑاٹ دوئی کننگ مریک۔