چاگڑدی بدلی تون مون تننگ کن ہلہلہ ئی گام گیج المی ءِ، مصدق ملک

اسلام آباد۔ 02 فروری (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ دِیر ءِ کوڑی کننگ کن چنکو ڈیم جوڑ کننگ آخبت کن اہم ءِ ، چاگڑدی بدلی تون مون تننگ کن ہلہلہ ئی گام گیج المی ءِ، چاگڑدی بدلی نا برخلاف جنگ ویٹ لینڈ انا رکھ اٹ کٹنگ مریک۔ داخیال آتا درشانی ءِ او دوشنبے نادے آ کنارہ پارک جناح روڈ بنی گالہ اسلام آباد اٹی ورلڈ ویٹ لینڈزڈے انا دود آن تران کرساکرے۔ بنجائی وزیر پارے کہ کاربن ءِ چٹفنگ کن ننے درخت و دِیر انا کوڑی کننگ نا کنارہ ویٹ لینڈ(دلدلی ڈغار) نا رکھ ءِ کروئی مریک، دا بیرہ دِیر، جھیل و کشتی آخا دا لکھ آ مخلوق نا روزگار نا ذریعہ ءِ، ویٹ لینڈز آ گزارا کروک آ خاہوت آتیکن دا زند و بقانا سوج ءِ، دا وسیلہ غاک 99 درسد الس کن ءُ، نئے کہ بیرہ اشرافیہ کن۔ اوپارے کہ درخت و ویٹ لینڈز چاگڑدی رکھ اتون السی روزگار نا سیبو ءِ، دا ملک ایلیٹ آخا دا 99 درسد مخلوق نا ءِ ہرا قدرتی وسیلہ غاتیا سیبو کیک، ویٹ لینڈز بھس مریک تو روزگار چٹک، درخت آتا گڈنگ بیرہ چاگڑد آکا لس بندغ نا زرگزران آ جلہو ءِ، درخت و ویٹ لینڈ غٹ آن بھلا قدرتی کاربن سنکس ءِ۔ اوپارے کہ گلوبل وارمنگ و کاربن ایمشنز آتا سوب آن گلیشیئرز ترندی اٹ دِیر مننگ ءِ، گلیشیئرز آتا دِیر مننگ قدرتی آفت آتے ودی کننگ ءِ، ویٹ لینڈ انا رکھ گلوبل وارمنگ تون گچین مقابلہ ءِ۔ بنجائی وزیرپارے کہ چاگڑدی بدلی نا برخلاف جنگ ویٹ لینڈ نا رکھ اٹ کٹنگ مریک۔ اوپارے کہ نن تینا اُرا و محلہ غاتیٹی ہم سفائی نا خاص خیال ءِ تخن۔ فضائی و آبی کچٹی ساڑی آ دور انا بھلا ویل ءِ، دِیر ءِ کوڑی کننگ کن چنکو ڈی جوڑ کننگ  آخبت کن اہم ءِ، رکھوک آخبت کن ننے کچٹی نا مون ءِ توروئی مریک۔ اوپارے کہ چاگڑدی بدلی تون مون تننگ کن ہلہلہ ئی گام گیج المی ءِ، جنگی حیات زند اکن اہم ءِ، چاگڑد نا رکھ ننا غٹ انا زمواری ءِ۔