کمبوڈیا نا چیئرمین سینیٹ سید یوسف رضاگیلانی ءِ جم وجوش اٹ بخیرکرے

اسلام آباد۔ 02 فروری (اے پی پی) کمبوڈیا نا حکومت پاکستان نا چیئرمین سینیٹ سید یوسف رضاگیلانی ءِ سرکاری دورہ نا بناء آ جم وجوش اٹ بخیرکرے۔ سینیٹ سیکرٹریٹ نا کنڈآن جاری بیان نا رداٹ داوخت آکمبوڈیا نا دارالحکومت نوم پنہ نا اہم شاہراہ و نمان السی ہند آتے پاکستان نا قومی بیرک آتیان آراستہ کننگا وخت اس کہ چیئرمین سینیٹ نا پن و عہدہ غا تالان خیرمقدمی بینرز خلنگا۔ دا غٹ بست وبند آتے کمبوڈین کمامدارآک سرکاری بیابخیری کمیٹی نا شریداری اٹ کریر ہرا دا دورہ نا اہمیت و پاکستان وکمبوڈیانا نیام اٹ متکن آ دوستانہ تعلقداری تا درشانی ءِ۔ بیربخیری دود و پروٹوکول بست وبند آک داہیت انا ڈیک ءِ ایترہ کہ کمبوڈیا نا حکومت پاکستان نا پارلیمانی سرکڑدہ غاتے قدر انا نظر اٹ ہرک و ہڑتوم آملک آتا نیام اٹ ہڑتوم آ کنڈآتا وپارلیمانی رابطہ غاتے پین مون آدننگ کن سنبرینگوک ءِ ۔ چیئرمین سینیٹ تون اوار پارلیمانی وسلابتی ڈل ہم ساڑی ءِ ہراٹی سینیٹرز قاسر سہروردی تیمور، سینیٹر عابد شیر علی، سینیٹر ضمیر حسین گھمر و مصباح کھر سلاہکار چیئرمین سینیٹ ئسک اوار ءُ۔ دادورہ پاکستان و کمبوڈیا نا نیام اٹ پارلیمانی کمکاری نا مون آ دننگ و تین پہ تینی فائدہ غاتیا تالان تعلقداری تے پین سوگو کننگ نا اسیجائی عزم انا عکاسی ءِ کیک۔