پاکستان دِیر ءِ بطور جنگی سلہہ کاریم اٹ اتنگ نا کوشست آتے جہانی کانود آتا سنگین خلاف ورزی تکک، وزیراعظم شہباز شریف نا آبی کوڑی تا جہانی دے آ کلہو

اسلام آباد۔ 02فروری (اے پی پی) وزیراعظم محمد شہباز شریف پارینے کہ پاکستان جہانی کانود نا پاسداری ءِ کرسا 1960نا سندھ طاس معاہدہ نا پورو و انصاف اٹ نافذ کننگ آ یخین تخک و دِیر ءِ بطور جنگی سلہہ کاریم اٹ اتنگ نا کوشست آتے جہانی کانود نا بھلا خلاف ورزی تکک۔ (اینو) دوشنبےنادے آاڈ تروک آ دنیا نا آبی کوڑی تا جہانی دے آ تینا کلہو اٹی وزیراعظم پارے کہ دادے پاکستان و اقوام عالم ءِ آبی کوڑی تا دیرپا رکھ و بست وبند نا عزم انا درشانی نا موقع  اس فراوان کیک۔ برجاسال دا دے ’’آبی کوڑی و روایتی علم:دودوربیدہ ئی میرات نا پاسداری ‘‘ نا بے کچ جوا ن سرحال نا رداٹ اڈتننگ انگ ءِ ہراننے آبی کوڑی تا دودوربیدہ ئی پس منظر و اہمیت نا یات دہانی کرفک۔ وزیراعظم پارے کہ پاکستان 1971نا آبی کوڑی تا جہانی معاہدہ نا باسک ءِ ہرانا رداٹ نون انسانی کن آبی کوڑی تا کاریم اٹ اتنگ و اوفتا وسیلہ غاتا رکھ ءِ تالان کننگک۔ داجہانی دے ہمو معاہدہ نا یات دہانی نا وڑاٹ اڈتننگک۔ وزیراعظم پارے کہ پت انا قابل آبی کوڑی ہرملک اکن چاگڑدی و زرگزرانی ویل آتون مون تننگ اٹ اہم کڑد ادا کیک، دا کوڑیک خشک سالی، نوکاپ و ترند موسمیاتی تغیرات آتا منفی اثرآتیان بچفنگ اٹ کمکار جوڑ مریرہ۔ ننا آبی کوڑیک، بشمول جھیل و گلیشیئرز، ہندی آبی  کوڑی و کرکی و مینگروو حیاتیاتی تنوع نا رکھ، چاگڑدی تغیر آن بچنگ و دِیر انا نظم ونسق نا سوب و لکھ آ پاکستانی تیکن آبی کوڑی ذریعہ معاش و ہڑدے ئی زند انا المی بشخ ءِ۔ اوپارے کہ آبی کوڑی تیٹی کمتی مخلوق نا روزگا راٹی کمتی، قومی کہول آ خور انا نہاد آتیٹی ودکی و نوکاپ و خشک سالی نا دروشم اس اختیار کیک۔ آبی کوڑی تا رکھ بیرہ موسمیاتی تغیر آن بچنگ کن چاگڑدی فرض اس آخا بلکن دا انفرادی و اجتماعی کہول آ راجی آسودہی نا ضامن ءِ۔ اوپارے کہ پاکستان جہانی کانود آتا پاسداری ءِ کرسا 1960نا سندھ طاس معاہدہ نا پورو و انصاف اٹ نافذ کننگ آ یخین تخک، دِیر ءِ جنگی سلہہ نا وڑاٹ کاریم اٹ اتنگ نا کوشست آتے جہانی کانود نا سنگین خلاف ورزی تکک و پبی وڑاٹ مسترد کیک۔ وزیراعظم پارے کہ ببو اینو نادے داقول ءِ پوسکن کین کہ نئے بیرہ انفرادی بلکن اجتماعی کہول آ ہم آبی کوڑی تے تینا نہادی قومی، چاگڑدی، راجی و دودوربیدہ ئی میرات تکسا اونا رکھ اکن پبی کوشست کینہ۔ جہانی کہول آ پاکستان ملک آتا نیام اٹ آبی کوڑی تا انصاف اٹ، کانودی وپرامن کاریم اٹ اتنگ نا مون آ دننگ کن تینا توار ءِ بڑز کرسا کیک۔