ریاست بھارتی پروپیگنڈا ءُ ناشرکاری ءِ ھلاپ ءَ سرجمی ءَ یکجاہ اِنت، طلال چوہدری

فیصل آباد۔ 01 فروری (اے پی پی):وزیر مملکت ءِ تہی کارانی سینیٹر طلال چوہدری ءَ گوشت کہ ھک آنی نام ءَ اسکول، ہسپتال ءُ بازار آناں نشانگ جوڑ کنگ سکیں مذمت ءِ لائکیں جرم اِنت ءُ ریاست اے وڑیں عناصر ءِ ھلاپ ءَ سرجمیں گامگیج زورگ ءَ اِنت۔ آئی ءَ وتی گس ءَ رسانکدر ءَ گوں تران کنان ءَ گْوشتگ کہ ھندی رسانکدر ءَ بلوچستان ءِ بابت ءَ منظم، دروگیں ءُ گمراہ کنوکیں پروپیگنڈا کتگ، بلوچستان ءِ ھک ءِ نام ءَ جعلی ویڈیو جوڑ کتگ ءُ دروگیں بیانیہ جوڑ کتگ، وھدے کہ ناشرکاری ءِ تہ ءَ ھندی سرپرستی ءِ پدّریں شوھاز ھست اَنت۔ آئی ءَ گوشت کہ جنگ ءَ چہ ہار بوھگ ءَ پد بھارت نوں پراکسی جنگ آنی تہ ءَ سرمایہ کاری کنگ ءَ انت، وھدیکہ بی ایل اے ءَ ھوار ایندگر ناشرکاریں گل آنی سر ءَ بندش جنگ بوتگ ءُ ایشانی ھلاپ ءَ ثبوت میاں اوستمانی براتی ءِ دیم ءَ ایر کنگ بوتگ انت۔ طلال چوہدری ءَ اے گپ ءِ پدر کنگ ءَ گشتگ کہ گوستگیں سئے روچانی تہا تیرہ وادی ءُ بلوچستان ءَ بوتگیں وئیل آنی بابت ءَ اے تاثر دیگ کہ ناشرکاراں 12 شہر ءُ مقبوضہ دمگ نشانگ جوڑ کتگ انت اے سرجم ءَ بے بن ءُ حقیقت ءِ ھلاپ انت۔ وزیر مملکت ءَ گوشت کہ ناشرکار عام مردم آنی رنگ ءَ اتکگ انت ءُ چندیں جتا جتائیں جاھاں سافٹ ٹارگٹ آناں نشانگ جوڑ کنگ ءِ کوشست کتگ۔ زالبول، زھگ ءُ بے سلاہیں شہری سپر ءِ رنگ ءَ کارمرز کتگ اَنت بلے سیکورٹی فورسز ءَ وتی اُرشانی ناکام کنگ ءُ شہری آنی ایمنی ءِ ھاترا وھد ءُ پاس ءِ سر ءَ جوانیں گامگیج چست کتگ۔ سیکورٹی فورسز ءَ کارروائی کتگ ءُ بازیں ناشرکار کشتگ ءُ بازیں دزگیر کتگ وھدے کہ گاریں مردمانی پدگیری برجاہ اِنت۔ طلال چوہدری ءَ گوشت کہ راجی ایکشن پلان ءِ رد ءَ انسداد ناشرکاری آپریشن سرجمیں زور ءَ گوں جاری انت ایشی ءِ سر ءَ درستیں سیاسی گل آنی سرجمیں تپاکی است انت۔ وفاقی حکومت بلوچستان حکومت ءِ گوما اوشتاتگ ءُ حکومت اے وہد ءَ سرجم ءَ الرٹ انت ۔ طلال چوہدری ءَ گوشت کہ بلوچستان ءِ سر وزیر میر سرفراز بگٹی ءُ تہی کارانی وزیر محسن نکوی شہری آنی گوما شانک پہ شانہ اوشتاتگ انت۔ وزیر مملکت ءَ شہید آنی قربانی آناں شگر ءُ منت پیش کت ءُ گوشت کہ اے قربانی کدی ھم بے سوب نہ بنت ءُ فراموش نہ بنت، مئے حوصلہ برز انت ءُ فتنہ الهندستان ءِ ناشرکار ھلاس بنت۔ آئی ءَ گْوشتگ کہ ناشرکار بلوچستان ءَ دیمروئی گندگ نہ لوٹ اَنت، وھدیکہ راستی ایش اِنت کہ بلوچستان ءَ امن بحال بوھگ ءَ اِنت ءُ بازیں دیمروئی منصوبگ دیم ءَ روگ ءَ اَنت۔ تیرہ وادی ءِ بابت ءَ گپ ءُ تران کنان ءَ طلال چوہدری ءَ گشتگ کہ اودا جیڈھ خیبر پختونخوا سرکار ءِ وعدہانی ناکامی ءُ لگتمالی ءِ آسر انت۔ آئی ءَ گوشت کہ 9 سال ءِ گوزگ ءَ ابید ھم نہ اسکول، نہ نادراھجاہ، نہ پولیس اسٹیشن جوڑ کنگ بوتگ کہ اے کے پی کے سرکار ءِ نااہلی ءِ پدریں ثبوت اِنت، وھدیکہ صوبائی سرکار ءَ اے پسو دیگی اِنت کہ ارباں کلدار پہ راج ءَ ایر کنگ بوتگ اَنت کجا شتگ اَنت۔