بلوچستان ءَ ھمگرنچیں ناشرکاری اُرش ناکام بوتگ اَنت، امن بحال بوتگ، سرجمیں راج ناشرکاری ءِ ھلاپ ءَ یکجاہ بوتگ، وفاقی وزیر دفاع خواجہ محمد آصف

سیالکوٹ۔1فروری  (اے پی پی):وفاقی دفاع ءِ وزیر خواجہ محمد آصف ءَ گشتگ کہ گوستگیں روچ ءَ بلوچستان ءَ دوازدہ جتا جتائیں جاہاں ناشرکاری ءُ ہون ریچی ءِ کوشست سرجمی ءَ بے سوب کنگ بوتگ انت۔ اللہ تعالیٰ ءِ فضل ءَ اے وھد ءَ سرجمیں بلوچستان ءَ امن ءُ ایمنی ءِ ھال اِنت ءُ سیکورٹی فورسز دژمن ءِ عناصر ءِ بے اثر کنگ ءِ آپریشن ءَ ھوار اَنت۔ یک شمبے ءِ روچ ءَ سیالکوٹ ءَ پریس کانفرنس ءَ گوں تران کنان ءَ وفاقی وزیر دفاع خواجہ محمد آصف ءَ گوشت کہ اے ھمگرنچیں اُرش گوستگیں یک سال ءِ تہ ءَ بوتگیں تاوان ءِ ھلاسی ءِ واستہ بی ایل اے ءُ آئی ءِ ھمگرنچیں گل آنی نیمگ ءَ ناکامیں کوشست بوتگ۔ ما گوستگیں دو سال ءَ مزنیں محنت کتگ ءُ پاکستان ءَ را اقتصادی دیمروئی ءِ راہ ءَ ایر کتگ ۔ اے اُرشانی مول ءُ مراد پاکستان ءِ بے رھبند کنگ ءُ ملک ءَ را معاشی ھرابکاری ءِ نیمگ ءَ کشگ بوتگ بلے دژمن وتی عزائم ءِ تہ ءَ ناکام بوتگ۔ آئی ءَ گوشت کہ بی ایل اے بنیاتی رنگ ءَ ھندوستان ءِ پراکسی اِنت ءُ ھندوستان ءُ بی ایل اے یکیں سکہ ءِ دو نیمگ اَنت۔ انٹیلی جنس ءِ زانتکاری ءُ دزگیریں ناشرکارانی اعترافی بیان اے گپ ءَ ثابت کن اَنت کہ درستیں کارانی بافت چہ ہندوستان ءَ پد بوتگ۔ بی ایل اے یک جھان ءِ تہ ءَ نامینتگیں ناشرکاریں گلے کہ ایشی ءِ سر ءَ پاکستان ءَ ھوار میاں اوستمانی تک ءَ بندش جنگ بوتگ۔ وفاقی وزیر ءَ گوشت کہ ناشرکاریں گل نوں زالبول ءُ زھگاں ھم کارمرد کنگ ءَ انت۔ کراچی ءِ ناکامیں وت کُشیں جنک ءُ پسنی ءِ ورنائیں جنک ءِ واقعہ اے گپ ءِ پدریں ثبوت انت کہ بے گناہیں ذہناں منظم رنگ ءَ انتہا پسندی ءِ نیمگ ءَ کشگ بوہگ ءَ انت۔ مردم فقر، بے روزگاری و اقتصادی مشکلات ءِ آماچیں مردم زانت ءُ زانگ ءَ نشانگ جوڑ کنگ بیگ ءَ اَنت۔ آئی ءَ گوشت کہ نوشکی ءُ دلبندین ءَ ایف سی ءِ بنجاہی کارگس ءَ را ھم وت کُشیں اُرشاں گوں نشانگ جوڑ کنگ ءِ کوشست کنگ بوتگ وھدے کہ سرجم ءَ نزیک ءَ دوازدھیں جاگہ ​​نشانگ جوڑ کنگ بوتگ اَنت۔ سیکورٹی فورسز ءَ وھد ءِ سر ءَ کارروائی کتگ ءُ درستیں ٹارگٹ ناکام کتگ اَنت۔ اے آپریشنانی تہا سیکورٹی فورسز ءِ یازدہ کارندہ شہید بوتگ انت، وھدیکہ گوستگیں دو روچانی تہا سد ءَ چہ گیش ناشرکار بیران بوتگ انت ءُ اے کساس ءِ تہا گیشی ءِ گمان است انت۔ وفاقی دفاع ءِ وزیر ءَ گشتگ کہ بلوچستان ءِ مزنیں دمگ ءُ کمیں آبادی ءِ سبب ءَ ناشرکاراں وہدی آسراتی رسگ ءَ انت بلے آیوکیں روچاں اے آسراتی ہم ہلاس کنگ بیت۔ اوگانستان ءَ جاہ منندیں ناشرکارانی سروکی بے گناہیں ورناہاں پہ وتی نا شریں مول ءُ مراداں کارمرز کنگ ءَ اِنت۔ خواجہ محمد آصف ءَ اے گپ پدر کت کہ پاکستان بی ایل اے ءُ ٹی ٹی پی ءِ ھلاپ ءَ دراجیں ءُ فیصلہ کنوکیں جنگ ءَ کنگ ءَ اِنت ءُ ملک ءِ کجام ھم دمگ ءَ اے گلانی ھلاپ ءَ ھچ وڑیں ھمدردی ءُ نرمیں ھیال ءِ گنجائش نیست۔ ناشرکاری ءَ ھواریں آسراتی ءِ ھلاپ ءَ ھم سکیں کارروائی کنگ بیت ءُ آ ھم ناشرکارانی وڑیں ھال ءَ گوں دچار کپ اَنت۔ آئی ءَ گوشت کہ گوست ءَ پاکستان ءِ نیمگ ءَ ناشرکاری ءِ ھلاپ ءَ چست کتگیں گامگیج آنی سبب ءَ خیبر پختونخوا ءُ بلوچستان ءَ ناشرکاری اُرش کم بوتگ اَنت بلے نوں ناشرکار آنی گیش جوانیں ٹارگٹ آناں نشانگ جوڑ کنگ ءِ ضلورت اِنت۔ ھر جاگہ ​​ءَ کہ ناشرکار ھست بہ بنت سیمسر ءِ تہ ءَ بہ بنت یا ڈن ءَ پاکستان وتی دفاع ءِ واستہ المی گامگیج چست کنت۔ وزیر دفاع ءَ گیش گوشت کہ مرچی سھب ءَ خیبر پختونخوا ءِ سر وزیر ءَ ھم ناشرکاری اُرش آنی مذمت کتگ ءُ سرجمیں راج ءِ گوما وتی توار ءَ را یکجا کتگ۔ ناشرکاری ءِ ھلاپ ءَ راجی جنگ ءَ سیاسی تپاوت ءَ را درستاں چہ گیش ایر کنگ المی انت۔ شہیدانی قربانی ہر استان ءِ زھگ ءُ جنک ءِ جلوہ اِنت، کہ آ وتی جاناں پہ مٹی ءُ وطن ءِ عزم ءَ قربان کنگ ءَ اَنت۔ ایشی ءِ تہا ہچ وڑیں سیاسی نپ ءُ پارٹی ءِ سیادی نیست بلے وفاداری ایوک ءَ پہ وطن ءُ زمین ءَ انت۔