پاکستان ءُ بنگلہ دیش ءَ روزگار ءُ انسانی وسائل ءِ دیمروئی ءِ تہ ءَ کمک ءَ را دیم ءَ برگ ءِ سر ءَ تپاک

اسلام آباد۔1فروری  (اے پی پی):پاکستان ءُ بنگلہ دیش ءِ نیام ءَ درملک ءَ روزگار ءُ انسانی وسائل ءِ دیمروئی ءِ ھوالگ ءَ کمک ءِ دیمروئی ءِ واستہ تپاک کنگ بوتگ۔ ابوظہبی ڈائیلاگ 2026 ءِ موہ ءَ اوورسیز پاکستانی آنی وفاقی وزیر چوہدری سالک  حسین ءَ بنگلہ دیش ءِ مہاجرین ءِ وشھالی ءُ اوورسیز روزگار ءِ وزارت ءِ مشیر ڈاکٹر آصف نذرال ءَ گوں گند ءُ نند کت۔ یک شمبے ءِ روچ ءَ ادا رستگیں بیان ءِ رد ءَ  گند ءُ نند ءِ ساھت ءَ دوئیں نیمگ ءَ وتی وتی ملک آں چہ درملک ءَ کار کنوکیں کارکن آناں چیلنج آنی سر ءَ ھیال ریچی کنگ بوت ءُ ہنر ءِ تربیت ءِ تہ ءَ گیشی ءُ ہنر ءِ دیمروئی ءِ سر ءَ ھم چار ءُ تپاسی کنگ بوت۔ پاکستانی ڈل ءَ نیشنل ووکیشنل اینڈ ٹیکنیکل ٹریننگ کمیشن ءِ کرد ءُ گامگیج آنی بابت ءَ سرپدی دات وھدیکہ بنگلہ دیشی نیمگ ءَ وتی ٹیکنیکل ٹریننگ سنٹر آنی آپریشنل فریم ورک ءِ سر ءَ زور پر دات۔ دوئیں ڈل آں وانگ ءُ زانگ، جان سلامتی، سیل ءُ سواد ءُ تجارت ءِ شوبگ ءَ دو نیمگی کمک ءِ دیمروئی ءِ امکانات آنی سر ءَ ھم چار ءُ تپاسی کت۔ اے موہ ءِ سر ءَ چیئرمین ایمپلائزز اولڈ ایج بینیفٹس انسٹی ٹیوشن پاکستان ءَ ادارگ ءِ مینڈیٹ، زمہ واری ءُ کارندہ آناں چاگردی سلامتی ءِ پجارینگ ءِ تہ ءَ آئی ءِ کرد ءِ بابت ءَ سرپدی دات۔ دوئیں نیمگاں یکے دومی ءِ تجربگ ءُ انسانی وسیلگ ءِ دیمروئی ءُ کار ءِ برآمد ءِ پڑ ءَ جوانیں کارروائی آنی تہ ءَ چہ دربرگ ءِ تہ ءَ سک باز دلگوشی ءِ درشانی کت، ایشی ءِ تہ ءَ بھرتی ءِ کارروائی، مہارت ءِ تربیت ءُ واتر بوھوکیں کارندہ آنی واستہ بحالی ءِ نظام ھوار اَنت۔ دوئیں نیمگاں وت مہ وتی مفاد ءِ شوبگ آنی تہ ءَ کمک ءَ را گیش کنگ ءِ واستہ برجاھیں ھوار بوھگ ءُ تعمیری گپ ءُ تران ءِ واستہ وتی عزم ءِ پدا پدر کت۔ گند ءُ نند ءَ امارات ءَ پاکستان ءُ بنگلہ دیش ءِ سفارتی مشن ءِ مزنیں کارندہ آں ھم شریک بوتگ ۔