پاکستان راجی ءُ میاں اوستمانی تک ءَ بین المذاہب یکوئی ءَ را دیم ءَ برگ ءُ جھان ءِ امن ءُ مفاہمت ءِ تہ ءَ جوڑیشت ءِ کرد پیلو کنگ ءِ ھاترا جزم اِنت، صدر آصف علی زرداری

اسلام آباد۔01 فرورئ  (اے پی پی):صدر ءِ مملکت آصف علی زرداری ءَ گوشت کہ پاکستان راجی ءُ میاں اوستمانی تک ءَ بین المذاہب یکوئی ءَ را دیمروئی دیگ ءُ جھان ءِ امن ءُ مفاہمت ءِ تہ ءَ جوڑیشت ءِ کرد ءَ پیلو کنگ ءِ واستہ جزمیگ انت۔ مئے ملک یک چاگردے کہ چہ تنوع مذهبی، دود ءُ ربیدگی، زبانی ءُ قومی ءَ زرباری اِنت۔ مئے آئین ءَ چہ مذہب ءُ عقیدہ ءَ ابید درستیں شہریاں مذہبی آزادی ءُ برابریں حقانی ضمانت داتگ۔ شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر آصف علی زرداری ءَ یکم ءَ بگر داں 7 فروری 2026 ءَ برجم دارگ بوھوکیں جھان ءِ بین المذاہب ھمگرنچی ءِ ھپتگ ءِ موہ ءَ وتی کلوہ ءِ تہ ءَ گوشت کہ من پاکستان ءِ میاں اوستمانی براتی ءَ را دل ءِ جہلانکی ءَ چہ مبارک بات دیگ ءَ آں ۔ اے موہ ءَ مارا ھما مشترکہ قدر ءُ قیمتانی یات کیت کہ آھانی تہا امن، شفقت، یکے دومی ءِ احترام ءُ ھمزوری ھوار انت کہ آ درستیں مذھب ءُ عقیدہ ءِ نظام ءِ بُن ھشت انت۔ صدر زرداری ءَ گشتگ کہ پاکستان مذہبی، دود ءُ ربیدگی، زبانی ءُ نسلی رنگ ءَ چہ مالا مالیں چاگرد انت۔ مئے آئین ءِ تہ ءَ چہ مذھب ءُ عقیدہ ءَ ابید درستیں شہریاں مذہبی آزادی ءُ برابری ءِ حق ءُ حقوق ءِ ضمانت دیگ بوتگ۔ اے رھبند پاکستان ءِ بُن ھشت ایر کنوک قائداعظم محمد علی جناح ءِ ھیال ءِ درشان ءَ کن اَنت کہ آئی ءَ پاکستانی راج ءِ بُن ھشت رواداری، یکوئی ءُ ھمگرنچی ءِ جار جتگ۔ ورلڈ بین المذاہب ہم آہنگی ءِ ہفتگ مارا اے شرپداریں قدر ءُ قیمتانی سرا وتی اجتماعی عزم ءِ نوک کنگ ءِ یک ھاسیں موہ ءِ دات کنت۔ بین المذاہب ءِ درک ءِ گوں عام شہری ءِ روچ مرزی زند ءَ مستقیم ءَ سیادی داریت۔ ھما جاھاں کہ ھمگرنچی ھست، زھگ بے ترس ءُ بیم ءَ وانگجاہ ءَ رو اَنت، عبادت جاہ امن ءُ پچ اَنت، محلہ چہ اعتماد ءَ پُر اَنت ءُ روزی ءِ وسیلہ شرپداریں رنگے ءَ کمائینگ ءُ برجاہ دارگ بنت۔ برعکس عدم برداشت ءُ تپاوت چاگردی زند ءَ را متاثر کنت، دمگی معیشتانی سرا منفی زور دنت ءُ ہما ایمنی ءِ احساس ءَ را نزور کنت کہ آئی ءِ سرا ھاندان ءِ انحصار انت۔ پمیشکا مذہبانی نیام ءَ احترام ءُ گپ ءُ تران ءِ دیمروئی یک خلاصہ اصولے نہ انت بلکیں چاگردی استحکام ءُ وشحالی ءِ ھاترا عملی لوٹ انت۔ تنازعہ، تپاکی ءُ گیش بوہوکیں عدم برداشت ءِ اے دور ءَ بین المذاہب رابطہ پیسر ءَ چہ گیشتر ہژدری بوتگ۔ تعصب ءُ نادلگوشی ءِ سرا غلبہ ءِ ھاترا جتائیں مذہب ءِ منوگراں بامردیں تعامل، تعلیم ءُ گپ ءُ تران المی انت۔ صدر زرداری ءَ گوشت کہ اخلاقی ارزشت ءَ ابید چاگردی یکوئی، برجائی امن ءُ یکجائی دیمروئی ءِ واستہ بین المذاہب یکوئی ھم بنیاتی انت۔ اسلام چو دگہ مزنیں مذہباں انصاف، امن ءُ ایمنی ءِ تعاون ءُ انسانی شرپ ءِ احترام ءِ درس ءَ دنت۔ شفقت، مہر ءُ برداشت ءِ وڑیں قدر ءُ قیمت دراہیں مذہبی دودمانانی تہا یک انت ءُ مارا یات دنت کہ مئے مشترکہ انسانیت مئے اختلافات ءَ چہ باز مھکم تر انت۔ انتہا پسندی ءِ ہر وڑیں رنگ ءَ رد کنگ ءُ یکے دومی ءِ سرا زانت ءُ سرپدی ءِ دیمروئی ءَ چہ ما وتی چاگرداں اعتماد ءُ یکوئی ءَ را گیش مھکم کنیں۔ آئی ءَ گوشت کہ من مذھبی رہشون، زانتکار، استاد، سول سوسائٹی ءِ گل ءُ ورنا آنی کوشست آناں ستا کن آں کہ آ چاگرد آنی نیام ءَ گپ ءُ تران ءُ ھمگرنچی ءِ دیمروئی ءِ واستہ کار کنگ ءَ اَنت۔ ایشانی ھزمت احترام ءِ دیمروئی، نفرت ءِ ھلاپ ءَ جنگ ءُ آیوکیں نسلانی رہشونی کنگ ءَ سک باز المی انت کہ آ تنوع ءَ را طاقت ءِ وسیلہ ءِ رنگ ءَ بہ گند انت۔ بیا اِت کہ ما وتی عزم ءَ نوک بہ کنیں کہ ما بین المذاہب ہم آہنگی ءِ ارزشتانی رکھینگ ءَ بہ کنیں، اقلیتانی حقانی رکھینگ ءَ بہ کنیں ءُ یک پرامنیں دنیا ءِ ھاتر ءَ یکجاہ کار بہ کنیں۔ اے ہفتگ مارا بامردیں کارروائی، باخبریں گپ ءُ تران ءُ یکے دومی ءِ احترام ءِ ہاترا الہام بہ دنت۔ پاکستان راجی ءُ میاں اوستمانی تک ءَ بین المذاہب یکوئی ءَ را دیمروئی دیگ ءُ جھان ءِ امن ءُ مفاہمت ءِ تہ ءَ جوڑیشت ءِ کرد پیلو کنگ ءِ واستہ جزم اِنت۔