مزن وزیر محمد شہباز شریف ءَ آذربائیجان ءِ گوما وت مہ وتی مفاد ءِ درستیں پڑ آنی تہ ءَ دو نیمگی سیادی آناں گیش مھکم کنگ ءِ جزم ءِ درشان

اسلام آباد۔30جنوری  (اے پی پی):مزن وزیر محمد شہباز شریف ءَ آذربائیجان ءِ گوما وت مہ وتی مفاد ءِ درستیں پڑ آنی تہ ءَ دو نیمگی سیادی آناں گیش مھکم کنگ ءِ وتی عزم ءِ پدرائی کت ءُ اے گپ ءِ سر ءَ دل یکیمی ءِ درشان کت کہ پاکستان ءُ آذربائیجان ءِ نیام ءَ پاکستان ءَ 2ارب ڈالر ءِ سرمایہ کاری ءِ واستہ یک معاہدے ءِ سر ءَ ھلاس کنگ بوھگ ءَ اِنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ را جمعہ ءِ روچ ءَ مزن وزیر گس ءَ جمہوریہ آذربائیجان ءِ صدر ءِ ھاسیں نمائندہ خلاف خلافوف ءَ گند ءُ نند کتگ۔ مزن وزیر ءَ آذربائیجان ءِ شرپداریں مہمان ءَ را وش اتک کنان ءَ پاکستان ءُ آذربائیجان ءِ نیام ءَ برات ءِ سیادی ءِ گرمیں رنگ ءَ ذکر کت ءُ وت مہ وتی مفاد ءِ توامیں پڑ آنی تہ ءَ آذربائیجان ءِ گوما دو نیمگی سیادی ءَ را گیش مھکم کنگ ءِ پاکستان ءِ عزم ءِ سر ءَ زور پر دات۔ آئی ءَ آذربائیجان ءِ صدر الہام علیوف ءَ را نیکیں واھشت آنی درشان کت۔ آئی ءَ صدر الہام علیف ءِ زانتکاریں سروکی ءِ توسیپ کت کہ آئی ءَ آذربائیجان ءِ جھان ءِ دروشم ءَ را بُرز کتگ۔ آئی ءَ صدر علیف ءِ گوما وتی بازیں ھاسیں گند ءُ نند ءِ یات کت کہ ایشی ءِ تہ ءَ گوستگیں نومبر ءَ باکو ءَ سوبمندی ءِ پریڈ ءِ ساھت ءَ برجم داشتگیں گند ءُ نند ھم ھوار اِنت۔ مزن وزیر ءَ اے گپ ءِ سر ءَ دل یکیمی ءِ درشان کت کہ دوئیں نیمگ ءَ آذربائیجان ءِ واستہ پاکستان ءَ 2 ارب ڈالر ءِ سرمایہ کاری ءِ واستہ یک معاہدے ءَ را گڈی رنگ ءَ کنگ ءِ نزیک ءَ انت۔ مزن وزیر ءَ صدر علیف ءَ را زوتاں چہ زوتاں پاکستان ءِ سرکاری تر ءُ تاب ءِ دعوت ءِ یک رندے پدا گوشت۔ گند ءُ نند ءَ دمگی جاورانی بابت ءَ ھم گپ ءُ تران کنگ بوت ۔ مزن وزیر ءَ پاکستان ءُ آذربائیجان ءِ نیام ءَ باقاعدہ ءُ نزیکیں رابطہ کاری ءِ ضلورت ءِ سر ءَ زور پر دات تانکہ دمگی امن ءُ ایمنی ءِ برجائی ءِ یکجائی مکسد ءِ سرجمی ءَ را دل یکیمی کنگ بہ بیت۔ آذربائیجان ءِ صدر ءِ نمائندہ ءَ مزن وزیر صدر علیف ءَ را نیکیں واھشت آنی پیغام سر کت ءُ مزن وزیر ءِ وژن ءُ سروکی ءِ توسیپ کت کہ ایشی ءَ چہ پاکستان ءَ را نہ ایوک ءَ اقتصادی محاذ ءَ بلکیں ایمنیءُ سفارتی پڑ ءَ ھم بازیں سوبمندی ءِ نیمگ ءَ رھادگ بوتگ۔ آئی ءَ دومی قاراباخ جنگ ءِ وھد ءَ آذربائیجان ءِ گوما مھکمیں رنگ ءَ اوشتگ ءِ پاکستان ءِ منت گپت ءُ جموں ءُ کشمیر ءِ ھوالگ ءَ آذربائیجان ءِ دیریں موقف ءِ پدا زور دات۔ نمائندہ ءَ مزن وزیر ءَ را صدر علیف ءِ نمدی ھم دات کہ ایشی ءِ تہ ءَ آذربائیجان ءِ نیمگ ءَ اے ماہ ءِ بندات ءَ اسلام آباد ءَ بنگیج بوتگیں آسن خدمت مرکاز ءِ جوڑیشت ءِ واستہ داتگیں کمک ءِ سر ءَ مزن وزیر ءِ ستا ءِ پیغام ءِ منگ بوتگ۔