پاکستان نا نظرثانی مروک کنٹرول لسٹ آتا جاری کننگ، برآمدی لیسن المی گوندنگا

اسلام آباد۔ 30 جنوری (اے پی پی) پاکستان ایکسپورٹ کنٹرول ایکٹ 2004 نا رداٹ نظرثانی مروک کنٹرول لسٹ آتے جاری کرینے۔ ایکسپورٹ کنٹرول آن گڈز، ٹیکنالوجیز ، مواد و ازبابِ جوہری و حیاتیاتی سلہہ و اوفتا فراوانی نظام نا بابت ایکٹ 2004 نا رداٹ دوئی واکداری تے کاریم اٹ اتسا حکومت پاکستان دا گڑاتا نظرثانی مروک قومی کنٹرول لڑ تے جاری کرینے ہرافتا برآمد کن وزارت خارجہ نا اسٹریٹجک ایکسپورٹ کنٹرول ڈویژن آن برآمدی لیسن درکارمریک۔ جمعہ نادے آ دفترخارجہ نا کنڈآن جاری بیان نا رداٹ دا تازہ انگا لڑتے گزٹ آف پاکستان اٹی ایس آراو 1977(1) 13، 2025 اکتوبر 2025ء نا رداٹ شینک کننگانے و ویب سائٹ www.secdiv.gov.pk آ دستیاب ءُ۔ دا کنٹرول لسٹ آتے اولیکو وار 2005ء ٹی جاری کننگاسس ہرافتے ٹی اوکان پد 2011، 2015ء، 2016ء ، 2018ء و 2022ء ٹی ترمیم کننگا۔ تازہ انگا نظرثانی نا مسخت نیوکلیئر سپلائرز گروپ (این ایس جی) ، میزائل ٹیکنالوجی کنٹرول رجیم (ایم ٹی سی آر) و آسٹریلیا گروپ (اے جی) نا کنڈآن برقرار تخوک آ کنٹرول لسٹ آتون ہم گرنچی ءِ پک کننگ ءِ۔ دانظرثانی سٹریٹجک ایکسپورٹ کنٹرول ڈویژن نا باقاعدہ جاچ عمل نا بشخ ءُ ہرا تعلقدار وزارت و محکمہ غاتون سلابت اتون انجام تننگا تانکہ پاکستان نا قومی کنٹرول آتے پوسکن، گچین و جہانی آب آتون ہم گرنچ تخنگ مرے۔ بیان اٹی مستی پاننگاکہ دا نوٹیفکیشن پاکستان نا ایکسپورٹ کنٹرول نظام ءِ پین سوگو کننگ نا عزم انا عکاسی ءِ کیک و اسہ زموار ٹیکنالوجی اس تخوک ریاست نا وڑاٹ اونا کڑد ءِ پک کیک ہرا بے تالانی نا مسخت و تینا جہانی زمواری تا پوروی کن سنبرینگوک ءِ۔