تحریک انصاف ءِ 8 فروری آ 9 مئی کون آحالیت ودی کننگ نا اسُل موکل تفننگک، امیر مقام

راولپنڈی۔ 30 جنوری (اے پی پی) بنجائی وزیر امور کشمیر ، گلگت بلستان و سیفران و صدر پاکستان مسلم لیگ (ن) خیبر پختونخوا انجینئر امیر مقام پارینے کہ تحریک انصاف ءِ 8 فروری آ 9 مئی کون آ حالیت ودی کننگ نا اسُل موکل تفننگک، خیبرپختونخوا نا صوبائی حکومت تینا ہی حکومت نا برخلاف برانز اسہ یکتا و مضحکہ خیز ءُ تماشہ اسے۔ داخیال آتا درشانی ءِ او راولپنڈی ٹی اڈ ہلوک اسہ بھلو السی مچی سے آن تران اٹی پارے کہ خیبرپختونخوا ٹی بے ڈولی، کرپشن  والس ءِ ریلیف فراوان کننگ اٹ بےسہبی پی ٹی آئی حکومت نا پہچان جوڑ مسنے وخت اس کہ صوبہ نا الس پی ٹی آئی نا دروغ انا قول و خورک نعرہ غاتے پورو وڑاٹ مسترد کرینے۔ اوپارے کہ الس داسہ سوگوی، شونداری و گچین حکمرانی کن مسلم لیگ (ن) نا کنڈآ ہُننگ ءُ۔ اوپارے کہ پی ٹی آئی صوبہ نا زرگزران ءِ بھس کرے ، ادارہ غاتے نزور کرے و ورناتے بے روزگاری نا مین اٹی دِکہ تس۔ اوپارے کہ خیبرپختونخوا نا الس داسہ ہمو شونداری آسراتی تے خواہنگ ءِ ہرا پنجاب اٹی فراوان کننگ انگ ءُ ہرافتے ٹی لیپ ٹاپ اسکیم، تعلیمی وظیفہ و ورناتیکن خصوصی آسودہی اوار ءِ۔ او افسوز نا درشانیءِ کرسا پارے کہ خیبرپختونخوا نا سرکاری ہسپتال دوائی و بنداوی آسراتی تا شدید کمتی نا گواچیءِ وخت اس کہ مسلم لیگ (ن) تعلیم وجان جوڑی نا مفت و آب اٹ آسراتی تیا یخین تخک۔ اوپارے کہ صوبائی حکومت السی ویل آتا ایسری نا جاگہ غا برانزودھرنہ غاتیٹی اختہ ءِ ہرانا سوب آن الس بنداوی آسراتی تیان محروم مسنے۔ بنجائی وزیرپارے کہ 9 مئی کون آ واقعہ غاتے دُوارہ کننگ نا کس اسے موکل تفننگک و 8 فروری آ ملک ءِ بند کننگ ناکال ءِ مسترد کینہ۔ اوپارے کہ تعلیمی ادارہ و طبی ہند آتا بندکننگ اصل اٹ پی ٹی آئی نا بے سہب حکمرانی نا اعتراف ءِ۔ اووزیراعظم شہباز شریف ءِ خراج تحسین پیش کرسا پارے کہ اونا مدبرانہ سرکڑدہ ئی ٹی ملکی زرگزران ءِ سوگوی ملا، جہانی کہول آ پاکستان ناپت بحال مس و ملک اسہ وار ولدا شونداری نا کسر آ ہنانے۔ اوفیلڈ مارشل سید عاصم منیر نا سرکڑدہ ئی ءِ تاریخی و جیرت مندانہ گوندسا پارے کہ پاک فوج سیوت، کسبی مہارت و بدل مفروک عزم اتون ملک انا دفاع ءِ ناقابل تسخیر جوڑ کرے و دشمن نا ناپاک عزم ءِ بے سہب کرے۔ ایسر اٹی انجینئر امیر مقام پوسکن اوار مروک آ راہشون و کارندہ غاتے پارٹی ٹوپی و مفلر بینفے و اوفتے بخیر اٹ پارے۔ پی ٹی آئی آن مسلم لیگ (ن) اٹی شمولیت اختیار کروک آتیٹی رشید خان، بشیر خان، اسرارخان، شیرخان، ساجد خان، اقبال خان، محمد محاذ ، محمد ثانی و لقمان ئسک اوار ءُ، ہرا بھلو کچ اسے ٹی تینا مخ تف آتون اوار پارٹی ٹی اوار مسر۔ ہندا وڑ اے این پی نا سینئر راہشون حاجی محمد صادق سربلی خان، عبدالخالق ، صدام حسین ، امیر محمد خان(یونین کونسل 36) ، محمد خالد، عطاءاللہ خان و امین الحق تون اوار پاکستان مسلم لیگ (ن) اٹی شمولیت اختیار کریر۔