صنعت آتیکن بجلی نا ٹیرف اٹی 4.04 روپئی فی یونٹ کمتی، اویس احمد خان لغاری

اسلام آباد۔ 30 جنوری (اے پی پی) بنجائی وزیر پاور ڈویژن سردار اویس احمد خان لغاری پارینے کہ وزیراعظم شہباز شریف نا کنڈآن پڑوکروک خصوصی ریلیف پیکج نا رداٹ صنعت آتیکن بجلی نا ٹیرف اٹی 4.04 روپئی فی یونٹ کمتی کننگانے۔ جمعہ نادے آ تینا سوشل میڈیا پلیٹ فارم ایکس آ جاری بیان اٹی بنجائی وزیر پارے کہ صنعتی بجلی نا بل آتیا مالی بھاریم، ہرا حکومت نا بناٹی 8.90 روپئی فی یونٹ ئس، داسہ کم مرسا صفر مسنے۔ اوپارے کہ دا بھاریم نا چٹفنگ آن وہیلنگ چارجز اٹی ہم کمتی بریک ہرانا رداٹ کراس سبسڈی میکانزم نا کمک اٹ صنعت آتیکن اوسطاََ 4.04 روپئی فی یونٹ کمتی مریک۔ اوپارے کہ دا گام گیج آتے ٹی صنعتی صارف آتے داسہ کم و ود 11.5 سینٹ فی یونٹ نا حساب اٹ بجلی دوئی مریک ہراڑآن صنعتی مسابقت اٹی ودکی و زرگزرانی شونداری ءِ سوگوی ملنگ نا گمان ءِ۔ بنجائی وزیر دا فیصلہ نا کریڈٹ  وزیراعظم شہباز شریف نا سرکڑدہ ئی و راہشونی ءِ ترساپارے کہ دا ریلیف پیکج صنعت آتا بحالی و پیدواری خڑچ اٹی کمتی کن حکومت نا عزم انا ڈیک ءِ۔ اویس لغاری ملکی زرگزران نا سمت آ پت انا درشانی ءِ کرسا پارے کہ داگام حکومت نا گیشتر وژن ‘‘اڑان پاکستان’’ تون ہم گرنچ ءِ۔