وزارت خزانہ 14 تُو انا مد اٹی مارکیٹ و سٹیٹ بینک ءِ واجب الادا 3654ارب روپئی نا ملکی وام تخوک آ وخت آن مست ادا کرے، خرم شہزاد

اسلام آباد۔ 30 جنوری (اے پی پی) وزیرخزانہ نا سلاہکار خرم شہزاد پارینے کہ 14 تُو انا مد اٹی وزارتِ خزانہ مارکیٹ و اسٹیٹ بینک آف پاکستان ءِ واجب الادا 3654ارب روپئی نا ملکی وام تخوک آ وخت آن مست ادا کرینے۔ وام تا وخت آن مست اداکننگ نا کمک اٹ السی مالیت ءِ سوگو کننگ، مالی ساکھ انا بحالی، و سٹیٹ بینک انا وام تیٹی نمان کمتی ٹی کمک رسینگا۔ راجی رابطہ نا ویب سائیٹ ایکس آ جاری بیان اٹی اوپارے کہ بیرہ 14 تُو انا مد اٹی وزارتِ خزانہ مارکیٹ و سٹیٹ بینک ءِ واجب الادا 3654 ارب روپئی نا ملکی وام تخوک آ وخت آن مست ادا کرینے، پنچ شنبے نادے آ سٹیٹ بینک ءِ تازہ انگا 300 ارب روپئی نا ادائیگی کننگا، دا تاریخی سرسہبی مالی نظم و ضبط، حکومتی ساکھ و زموارانہ زرگزرانی بست وبند نا کنڈآ فیصلہ ئی بدلی نا ڈیک ءِ۔ خرم شہزاد پارے کہ دسمبر 2024 ٹی اسہ ہزار ارب روپئی، جون 2025اٹی 1160 ارب روپئی ، اگست 2025اٹی 1160ارب روپئی، اکتوبر 2025اٹی 200 ارب روپئی ، دسمبر 2025اٹی 494ارب روپئی و جنوری 2026اٹی 300 ارب روپئی نا وام تا ادائیگی کننگا، پنچ شنبے نادے آ ادائیگی آن پد بیرہ برجامالی سال (جولائی آن جنوری ) ٹی ہی 2150ارب روپئی آن زیات نا وام وخت آن مست اداکننگانے ہرا تدوک آ مالی سال نا مقابلہ ٹی 44 درسد زیات ءِ۔