سیکورٹی فورس آتا بلوچستان اٹی آپریشن، بھارتی پراکسیز’’فتنۃ الخوارج‘‘ و ’’فتنۃ الہندوستان ‘‘ آن تعلق تخوک آ 41 دہشت گرد خلنگار، آئی ایس پی آر

راولپنڈی۔ 30 جنوری (اے پی پی) سیکورٹی فورس آتا بلوچستان اٹی اِرا جتا جتا آپریشن تیٹی بھارتی پراکسیز ’’فتنۃ الخوارج‘‘ و ’’فتنۃ الہندوستان ‘‘ آن تعلق تخوک آ 41 دہشت گرد خلنگار۔ آئی ایس پی آر نا رداٹ اولیکو انٹیلی جنس بیسڈ آپریشن ضلع ہرنائی نا کیبی ٹی ’فتنۃ الخوارج‘ نا ساڑی گری نا حوال آ کننگا۔ آپریشن اٹی پاک فوج انا دستہ غاک دہشت گرد آتا ٹھکانہ غاتے گچین وڑاٹ شست کریر۔ ترند اسہ ایلو آ سم کاری آن پد بھارت نا سرپرستی ٹی کاریم کروک آ 30 خارجی تے جہنمی کننگا۔ خلنگوک آ خارجی تا کوزہ غان بھلو کچ اسے ٹی سلہہ، گولہ بارود و دھماکہ خیز مواد ہم دوئی مس ہرافتے ہمووختآ بھس کننگا۔ ارٹ میکو انٹیلی جنس بیسڈ آپریشن ضلع پنجگور اٹی کننگا ہراڑے دہشت گرد آتا اسہ ٹھکانہ اسے نیست و نابود کرسا ’’فتنۃ الہندوستان ‘‘ نا 11 بھارتی سپانسرڈ دہشت گرد آتے ٹھکانہ خلنگا۔ سلہہ و گولہ بارود آن بیدس ، دا دہشت گرد آتیان ہمو زر ہم دوئی مس ہرا 15 دسمبر 2025 آ پنجگور اٹی اسہ بینک ڈکیتی اسے ٹی پُلنگاسر۔ دا دہشت گرد آ ک مستین اٹی دہشت گردی نا چندی کارروائی تیٹی اوار  رہینگاسر۔ علاقہ ٹی ساڑی پین بھارتی سپانسرڈ دہشت گرد اسے نا چٹفنگ کن ’’سینیٹائزیشن آپریشنز‘‘ برجاءِ۔ نیشنل ایکشن پلان نا فیڈرل ایپکس کمیٹی نا منظور مروک وژن نا ’’عزم استحکام ‘‘ نا رداٹ سیکورٹی فورس و پاکستان ناکانود نافذ کروک آ ادارہ غاتا کنڈآن دہشت گردی نا برخلاف دا بےلچک مہم پورو واک آتون برجاسلک تانکہ ملک آن پیشن نا امداد یافتہ دہشت گردی نا لعنت ءِ پورو وڑاٹ چٹفنگ مرے۔