وزیراعظم شہباز شریف نا برآمد کنندگان تیکن خراج اٹی مسہ درسد، بجلی نا ٹیرف اٹی چار روپئی چار پیسہ پین کمتی، نمان کارکڑد نشان تروک آ بھلا برآمد کنندگان آتیکن اِرا سال اسکان بلیو پاسپورٹس تون اوار چندی آسودہی تا پڑو

اسلام آباد۔ 30 جنوری (اے پی پی) وزیراعظم محمد شہباز شریف برآمد کنندگان آتیکن خراج اٹی مسہ درسد، بجلی نا ٹیرف اٹی چار روپئی چار پیسہ پین کمتی، نمان کارکڑد نشان تروک آ بھلا برآمد کنندگان آتیکن اِرا سال اسکان بلیو پاسپورٹس تون اوار چندی آسودہی تا پڑو ءِ کرساپارینے کہ برآمد کنندگان آتا بدل مفروک خواری آن ملک اٹی ارب آ ڈالر بس، زرگزران سوگوی اٹ پائیدار شونداری نا کنڈآ ہِننگ ءِ، معرکہ حق آن پد دنیا ٹی ننا دھاک توس ہرا مہالو سلام کتوکہ داسہ سینہ ٹی خلیک، سیاسی و عسکری سرکڑدہ غاک ملکی شونداری و شونہالی کن اواری اٹ کاریم کننگ ءُ، منہ سال آتیٹی ملکی زرگزران ءِ بدل کننگ نا اہلیت تخنہ، زرگزرانی سرسہبی نا مشکل سفر اٹی سرسہبی کن دے و نن ءِ اسٹ کروئی مریک۔ اوداخیال آتا درشانی ءِ جمعہ نادے آ داڑے ملک انا نمان برآمد کنندگان و کاروباری شخصیت آتا اعزاز اٹی اڈ ہلوک دود آن تران کرساکرے۔ نائب وزیراعظم ووزیرخارجہ محمد اسحاق ڈار ، وزیرخزانہ محمد اورنگزیب، بنجائی وزیر خواجہ محمد آصف، عطاء اللہ تارڑ، جام کمال، احسن اقبال ، راناتنویر حسین، شزہ فاطمہ خواجہ، مصدق ملک ، عبدالعلیم خان ، حنیف عباسی، تون اوار بنجائی وزیرآک، خصوصی کمکار آک ، سلاہکار آک و نمان برآمد کنندگان و کاروباری شخصیت آک ہم دود اٹی ساڑی ئسر۔ وزیراعظم نمان برآمد کنندگان و کاروباری شخصیت آتے 2024و 2025اٹی اوفتا کارکڑد نا بنداو آ ایوارڈ تس۔ دود آن تران کرسا وزیراعظم پارے کہ او  مچ آپاکستان آن  بروک مایہ ناز کاروباری شخصیت آتے بخیر اٹ پانہ ہرافک دے ونن خواری کرسا ملک انا پن ءِ روشنا کریر و ملکی برآمدآتیٹی نمان ودکی کریر۔ وزیراعظم پارے کہ برآمد کنندگان آک مشکل حالیت آتیٹی گچین کاریم کریر، مچ آقوم اوفتے مبارکبادی پیش کیک، برآمد کنندگان آتا بدل مفروک خواری آن ملک اٹی ارب آڈالر بس۔ وزیراعظم بشخ ہلوک آتے یات ترفے کہ مستین خڑک اٹی پاکستان نا خواتہ مننگ نا ہیت  آتے کرسا کننگا ملک ءِ خواتہ مننگ آن بچفنگ ننکن بھلو چیلنج ا س ئس، حکومت ءِ سنبھالان تو ملک انا زرگزرانی حالیت خراب ئس، آئی ایم ایف بھلو مشکل اسے اٹ پاکستان کن زرگزرانی پروگرام نا منظوری ءِ تس، حکومت نا کوشست آتیان ملک خواتہ مننگ آن بچا وخت اس کہ گڑاس سازشی ملک ءِ خواتہ مننگ نا اومیت کریسر توسوسر، ولے اوفتا باوہ یلہ غان یلہ رہینگا۔ وزیراعظم پارے کہ ای آئی ایم ایف ءِ باوری کرفیٹ کہ ہراقول آتے کننگک اوفک پورو مریرہ انتئے کہ مستین اٹی داوڑ متوکہ، دا پروگرام نا سوب آن لس بندغ و کاروباری تپہ ءِ مشکلات آتا مون تروئی تما ولے اوفتا قربانی تا سوب آن ملک ہرا ڈیفالٹ نا دنگ آ ئس اینو سوگو زرگزران تون پائیدار شونداری نا کنڈآ ہِننگ ءِ۔ کبینی نا کچ اٹی پدریسہ کمتی بننگ ءِ، پالیسی ریٹ 22 درسد آن کم مرسا 10 ءُ نیم درسد اسکان بسنے۔ وزیراعظم پارے کہ فارن ایکسچینج ریزروز ڈبل مسنے، داٹی بلاشبہ سنگت ملک آتا وامک ہم اوار ءُ، ہراڑکن اوفک و فیلڈ مارشل چندی ملک آتا دورہ غاتے کریر۔وزیراعظم چین، سعودی عرب، یواے ای، قطر اتون اوار سنگت ملک آتا منت واری ءِ ہرفے ہرافک مشکل انگا حالیت آتیٹی کمک کریر۔ وزیراعظم پارے کہ وام تیان پاکستان کن مشکلات ودی مریک، ننے سنگت ملک آتا است خواہی تا خیال ءِ تخوئی مریک و ننا کاٹم شیف مریک ہنداسوب آن زرگزران نا سوگو مننگ گنج اس اف، نیزگاری، بیروزگاری  نامون ءِ توروئی مریک، برآمدات آتے پین ودفوئی مریک۔ وزیراعظم پارے کہ او زرکار و کاروباری تپہ غاتا مشکلات آتیان معلومدار ءِ، اوفتے آسودہی نا گرج ءِ، کاروباری تپہ غاتے سلابت اٹ اوار کرین، 9 سب کمیٹی جوڑ کرین ہرافتا کماشی ءِ نجی بشخ ءِ تسن، اوفتا سلابت آن پالیسی جوڑ کرین و فیصلہ کرین۔ وزیراعظم پارے کہ اواری اٹ پاکستان ءِ شونداری نا کسر آ دروئی مریک، کاروباری برادری نا ساڑی آحکومت آ پت ستاکڑزک، حکومتی کوشست آتیان کبینی سنگل ڈیجٹ آ بسنے ، حکومت ناکاریم کاروبار کننگ اف بلکن داڑکن سازگار چاگڑد فراوان کننگ ءِ، برآمد آتیاتالان زرگزرانی شونداری ءِ مون آ دننگ آن بیدس پین ہچ ءُ کسر اس اف، برآمد آتیا تالان زرگزرانی شونداری ننا چکار نا وت ءِ۔ اوباوری کرفے کہ پوریاگر برادری ءِ کاروباری آسراتی تا فراوانی ءِ پک کینہ۔ وزیراعظم پاکستان نا سفارتی و دفاعی پڑآ سرسہبی تا ذکر ءِکرساپارے کہ معرکہ حق اٹی سرسہبی آن پد پاکستان نا دنیا ٹی یکتا ہند اس جوڑ مسنے، بھارت ءِ ہندن ءُ شکست اس تسن کہ اونا نسل آک یات تخرہ، سرسہبی آن پد دنیا ننے رشک و مہرومریبت اٹ ہُننگ ءِ ، جہانی دورہ غاتیٹی جہانی سروک و راہشون تا رویہ بدل مرسا خنانن، مچ آ دنیا ٹی پاکستانی پاسپورٹ ءِ داسہ عزت نا نظر اٹ ہُننگک، معرکہ حق آن پد چندی ملک آتا سروک آک ہرا مہالو سلام ہلنگ اٹ ہبکہ مسرہ داسہ برسا بغل گیر مریرہ، دنیا غا ننا ہندن ءُ دھاک اس توسنے کہ داسہ ننا ہیت ءِ مننگک، زرکاری کن رابطہ کننگ انگ ءِ۔ وزیراعظم پارے کہ سفارتی و عسکری سرسہبی آن پد زرگزرانی سرسہبی اہم چیلنج ءِ، دااسہ سخت ءُ سفر اسے ہراڑکن دے ونن ءِاسٹ کروئی مریک و دے ونن کاریم کروئی مریک۔ وزیراعظم پارے کہ شونداری نا سفر داسہ بناکننگ خواہک، برآمدات و درآمدات آتیٹی توازن اتوئی مریک۔ وزیراعظم ایوارڈز دوئی کروک آتے اِرا سال اکن بلیو پاسپورٹ و ایمبیسیڈر ایٹ لارج انا درجہ تننگ نا پڑو کرے ۔ اوپارے کہ پی آئی اے نانجکاری شفاف وڑاٹ مرسا غٹ خنار، شفافیت نا عمل ءِ پک کرسا نجکاری مریک، پی آئی اے نا شونداری کن حکومت پبی کمکاری فراوان کیک۔ وزیراعظم حکومتی خڑچ آتے کم کننگ نا گام گیج آتیان معلومدار کرسا پارے کہ پی ڈبلیو ڈی و یوٹیلیٹی اسٹورز ءِ کرپشن و ہیبدار کارکڑد نا سوب بند کننگانے، پاسکوءِ ہم ہیبدار کارکڑد آ بند کرین، ادارہ غاتیٹی گچینی کن اصلاحات اتنگ اُن، ڈیجیٹل والٹس نا کمک اٹ اُراٹی تولوک حقدار آتے 16 ارب روپئی روچہ پیکج نا مد اٹی تسن، برجاسال 40 ارب روپئی بزرگ آتیٹی ڈیجیٹل ادائیگی نا کمک اٹ بشخنہ۔ وزیراعظم پارے کہ مہالو آئی ایم ایف کمامدارآک پاریرہ کہ پاکستانی حکومت انتس پاہک کرسا نشان تفک، داسہ او پاہک کہ نن کرسا نشان ایتنہ، اوفتا دا لوز آک بیرہ کنکن اعزاز اس آخا بلکن دا ملک اکن گمرنا قابل ءِ۔ وزیراعظم صارف آتیان وصولی کرسا قومی خزانہ ٹی خراج جمع کرفپروک آتے خبڑدار کرسا پارے کہ اوفتے خراج تروئی مریک، ہچ ءُ معافی اس ملیپک۔ غٹ آن مست شوگر مل آتیان 50 ارب نا ریکوری کرین، سیم تیان پیٹرولیم نا اسمگلنگ بند مسنے ، ماہانہ ریونیو ٹی ودکی مس۔ وزیراعظم صنعت کن بجلی ٹیرف اٹی 4 روپئی 4 پیسہ فی یونٹ پین کمتی نا پڑو کرے۔ اوبرآمد کنندگان آتیکن خراج اٹی 3 درسد کمتی نا ہم پڑو کرے و پارے کہ برآمد کنندگان آتیکن خراج 7 ءُ نیم آن کم کرسا 4 ءُ نیم درسد آ اتنگ اُن۔ وزیراعظم ویلنگ چارجزاٹی کمتی نا ہم پڑو کرے۔ اوبینک آتا بڑزکو کمامدارآتیا زور شاغا کہ او چنکا و نیامی درجہی نا صنعت آتے ہم وام ایتر۔ دود اٹی ساڑی حکومت نا زرگزرانی کارکڑد آ دستاویزی فلم اس نشان تننگا وخت اس کہ وزیراعظم لکی ٹیکسٹائل ، صوفی انڈسٹریز، نو اٹیکسٹائل، یوایس اپیرل ٹیکسٹائل، آصف رائس ملز، الکرم ٹیکسٹائل، سفائر ٹیکسٹائل، نیزگار سنز رائس ملز، ڈائمنڈ فیبرکس ، ریاض ٹیکسٹائل ، صداقت پرائیویٹ لمیٹڈ ، سٹائل ٹیکسٹائل تون اوار نمان برآمدکنندگان آتے ایوارڈز ہم تس۔