وزیراعظم محمد شہباز شریف نا کماشی ٹی پاکستان شونداری نا کنڈآ ہِننگ ءِ، اینو نا حالیت گچین، زرگزران سوگو و کاروباری شخصیت آتا و ادارہ غاتا پت بحال مننگ ءِ، وزیر واپار جام کمال خان

اسلام آباد۔ 30 جنوری (اے پی پی) بنجائی وزیر واپار جام کمال خان پارینے کہ وزیراعظم محمد شہباز شریف نا کماشی ٹی پاکستان شونداری نا مزل آتے طے کننگ ءِ، مسہ سال مست انا نسبت اینو نا حالیت بھاز گچین، زرگزران  سوگو و کاروباری شخصیت و ادارہ غاتا پت بحال مننگ ءِ، وزیراعظم نا ویژن نا سوب ملک انا جہانی کہول آ پن روشنا و دنیا ننا معترف ءِ۔ داخیال آتا درشانی ءِ او جمعہ نادے آ داڑے ملک انا پنی آ ایکسپورٹرز وکاروباری شخصیت آتا اعزاز اٹی اڈ ہلوک دود آن تران اٹی کرے ہراٹی وزیراعظم محمد شہباز شریف ، نائب وزیراعظم و وزیرخارجہ اسحاق ڈار و بنجائی وزیر آوتن اوار کاروباری بندغ آک بشخ ہلکر۔ وزیر واپار جام کمال خان پارے کہ وزیراعظم محمد شہباز شریف بزنس کمیونٹی تون اوار ہِننگ ءِ و دااوفتے مون تروک ویل آتے دمدستی ایسر کننگ ءِ۔ اوپارے کہ وزیراعظم نجی بشخ اتون براہ راست رابطہ غاتیٹی ءِ، او خواہک کہ ملک اٹی کاروبار کن سازگار چاگڑد اس فراوان کننگے تانکہ پیشن نا زرکار  وہندی صنعت کار آتے آسانی فراوان کننگ مرے۔ اونا پاننگ ئس کہ مستین اٹ ننا خارجہ پالیسی داخہ سوگو الوکہ اخس کہ داسہ ارے، اینو جہانی منڈی اسکان پاکستان ءِ رسینگ ملنگ ءِ ہراکہ ملکی زرگزران و ہندی زرکارآتیکن ستاکڑزوک ہیت اسے۔