بنجائی وزیر پیٹرولیم تون سعودی سفیر نواف بن سعید احمد المالکی نا اوڑدہی

اسلام آباد ۔ 30جنوری (اے پی پی) بنجائی وزیر پیٹرولیم علی پرویز ملک تون سعودی عرب نا سفیر نواف بن سعید احمد المالکی اوڑدہی کرے، ہراٹی تین پہ تینی کمکاری نا چندی بشخ و ہڑتوم آ ایلم ملک آتا نیام اٹ ہڑتوم آ کنڈآتا تعلقداری تے پین سوگو کننگ آ گپ وتران کننگا۔ اوڑدہی ٹی فریق آک برجاکمکاری ناجاچ ءِ ہلکر و خاص کر توانائی و معدنیات نا بشخ آتیٹی کمکاری ءِ ودفنگ آ امنا کریر۔ داوخت آ اقتصادی شریداری ءِ مون آدننگ و تین پہ تینی مفاد آ تالان زرکاری نا وارخواہی تے مون آ دننگ نا عزم انا ہم درشانی ءِ کننگا۔ سعودی سفیر نواف بن سعید احمد المالکی ریاض اٹی زوت آتے اٹ اڈ ہلوک آ فیوچر منرلز فورم اٹی پاکستان نا فعال بشخ ہلنگ نا ستاءِ کرے ومعدنیات نا بشخ اٹی کمکاری ءِ مون آ دننگ کن ہڑتوم آملک آتا نیام اٹ پدریسہ رابطہ غاتا اہمیت آ زور شاغا۔ بنجائی وزیر علی پرویز ملک فیوچر منرلز فورم نا سرسہب اڈتننگ آ سعودی عرب ءِ مبارکبادی تس و پارے کہ دا پلیٹ فارم علاقائی کمکاری کن اہم ءُ وارخواہی اس فراوان کیک۔ اوداہیت آ زور شاغا کہ پاکستان و سعودی عرب تون معدنیات و توانائی نا ہڑتوم آ بشخ آتیٹی کمکاری  ءِ پین سوگو کننگ نا بھلو لائخی اس ارے۔ بنجائی وزیر داپت انا درشانی ءِ کرے کہ پاکستان و سعودی عرب نانیام اٹ متکن آ برادرانہ تعلقداری پبی نتیجہ، زرکاری، ٹیکنالوجی نا ہل و تس و پائیدار شونداری نا اسیجائی گام گیج آتے مون آ دینہ۔ اوڑدہی ٹی ہڑتوم آ فریق آک بروک آ وخت اٹی اقتصادی و سٹریٹجک کمکاری ءِ پین سوگو کننگ کن خڑکی رابطہ ءِ برقرار تخنگ آ ہم امنا کریر۔