بنجائی وزیر جان جوڑی سید مصطفیٰ کمال نا کماشی ٹی بڑزکو کہولی دیوان، زڑدوئی ڈیلٹا نا برخلاف جہانی کمکاری و ہندی تیاری نا مون آدننگ نا جاچ ءِ ہلنگا

اسلام آباد۔ 30 جنوری (اے پی پی) بنجائی وزیر جان جوڑی سید مصطفیٰ کمال نا کماشی ٹی بڑزکو کہولی دیوان اس مس ہراٹی زڑدوئی ڈیلٹا نا برخلاف جہانی کمکاری و ہندی تیاری نا مون آ دننگ نا جاچ ءِ ہلنگا۔ وزارتِ جان جوڑی و ڈرگ ریگولیٹری اتھارٹی پاکستان (ڈریپ) نا شریداری اٹ زڑدوئی ڈیلٹا نا برخلاف جہانی کمکاری و ہندی تیاری نا مون آ دننگ نا بابت دا دیوان اٹی وزیر جان جوڑی پارے کہ پاکستان اٹ زڑدوئی ڈیلٹا(ایچ ڈی او) بھلو طبی ءُ ویل اس جوڑ مرسا کننگ ء، دا جغر ءِ زہمی کروک آ اسہ یکتا و خطرناک ءُ دین اسے ہرا بیرہ ہندا دروشم ناجوڑی ودی کیک ہراتم مریض زڑدوئی بی دین(ایچ بی وی) آن زہمی مرے۔ اونا پاننگ ئس کہ پاکستان اٹ زڑدوئی بی انا مریض آتا بھلو کچ اسے نا سوب زڑدوئی ڈیلٹا السی جان جوڑی نا اہم ویل جوڑ مسنے ہراڑتون گچین حکمت عملی ، وخت آ تشخیص و سوگو درمان نا کمک اٹ مون تننگ المی ءِ۔ دیوان اٹی چین نا پنی دواساز کمپنی ہُواہوئی ہیلتھ انا نمائندہ غاک ہم بشخ ہلکر، بشخ ہلوک آک پاکستان اٹ ترندی اٹ تالان مروک آ زڑدوئی ڈیلٹا دین اتون مون تننگ کن ساڑی آ حالیت، چیلنج و گمانی گام گیج آتا جاچ ءِ ہلکر۔ چینی کمپنی نا نمائندہ غاک پوسکن پٹ وپول آ تا لان زڑدوئی ڈیلٹا تھراپی HH-003نا پیش رفت آن معلومدار کریر ہر ازوت آتے اٹ فیز ٹو نا سرسہب جہانی کلینیکل ٹرائلز پورو کرے، دادوا ءِ چین اٹی رکھوک و گچین مننگ نا بنداو آ منظوری ہم دوئی مسنے وخت اس کہ امریکن فوڈ اینڈ ڈرگ ایڈمنسٹریشن (ایف ڈی اے) دادرمان ءِ بریک تھرو تھراپی نا درجہ تسنے۔