ڈپٹی چیئرمین سینیٹ سیدال خان ناصر تون بنجائی وزیر رانا محمد قاسم نون تون اوار برطانوی پارلیمنٹ نا باسک عمران حسین نا اوڑدہی

اسلام آباد۔ 30 جنوری (اے پی پی) ڈپٹی چیئرمین سینیٹ سیدال خان ناصر تون بنجائی وزیر و چیئرمین پارلیمانی کمیٹی کشمیر رانا محمد قاسم نون تون اوار برطانوی پارلیمنٹ نا باسک عمران حسین 15 باسکی ڈل اتون پارلیمنٹ ہاؤس اٹی اوڑدہی کرے ہراٹی پاک برطانیہ پارلیمانی، زرگزرانی و اقتصادی تعلقداری، ہموڑے رہینگوک پاکستانی تا کڑد ، ملک انا پدسلوک علاقہ غاتا شونداری و کشمیر نا ویل اتون اوار چندی امور تا بارواٹی سرجمی اٹ گپ وتران کننگا۔ سینیٹ سیکرٹریٹ آن جاری بیان نا رداٹ ڈل اٹی عمران حسین نا باوہ، مسکوہی باسک برطانوی پارلیمنٹ و راجی تنظیم آرفن ان نیڈز انا کنٹری ڈائریکٹر محمد فیصل اسحاق تون اوار ہیڈ آف فنڈریزنگ ئسک ہم اوار ئسر۔ اوڑدہی ٹی پاکستان و برطانیہ نا نیام اٹ پارلیمانی، زرگزرانی و اقتصادی تعلقداری ، برطانیہ ٹی رہینگوک پاکستانی تا کڑد، پاکستان نا پدسلوک علاقہ غاتا شونداری و کشمیر نا ویل اتون اوار چندی امور تا بارواٹی سرجمی اٹ گپ وتران کننگا۔ آرفن ان نیڈز انا نمائندہ غاک ڈپٹی چیئرمین سینیٹ ءِ پاریر کہ دا تنظیم دنیا نا چانڑدہ ملک آتیٹی اسہ لکھ ءُ بیست ہزار آن زیات چوری چناتا کفالت ءِ کننگ ءِ، تنظیم چوری تا راجی آسودہی، تعلیم وراجی شونداری کن چندی ڈٹ آتیاکاریم کننگ اٹی ءِ و پاکستان ناپدسلوک علاقہ غاتیاہم خاص چکار کننگ اٹی ءِ۔ اوپارے کہ بہاولپور و مظفر آباد اٹی تنظیم نا ہند جوڑ مسنے وخت اس کہ 1200 چناتے تعلیمی وظیفہ تننگانے۔ راجی تنظیم نا اسہ طالب علم اس داسہ پی ایچ ڈی کننگ ءِ وخت اس کہ اسہ طالبہ اس لیڈی ڈاکٹر جوڑ مسنے، داکان بیدس جنوزان تے ماہانہ راشن فراوان کننگ و اوفتے کن اُراہم تفنگ انگ ءِ۔ ڈپٹی چیئرمین سینیٹ سیدال خان ناصر تنظیم نا خذمت آتا ستاءِ کرساپارے کہ چوری و جنوزان تیکن دا ستاکڑزوک ءُ کاریم اسے ہرانا دنگ ءِ ملک انا پین پدسلوک علاقہ غاتسکان بایدے ودفنگے تانکہ زیات آن زیات حقدار بندغ آک فائدہ ہرفنگ کیر۔ اوپارے کہ ملک انا 24 پدسلوک ضلع غاتیان 17 صوبہ بلوچستان اٹی واقع ءُ ہراڑے دہشت گردی، امن و ایمنی، سیکورٹی و واپاری ویل مون تروک ءِ، داوڑنا علاقہ غاتیٹی  آسودہی ڈٹ آتیان الس ءِ حقی فائدہ ملنگ کیک۔