وزیراعظم محمد شہباز شریف نا پاکستان آسٹریلیا ٹوئنٹی سیریز نا اولیکو میچ اٹی قومی ٹیم انا سرسہبی آ کرکٹ شونقی تے مبارکباد

اسلام آباد۔ 30 جنوری (اے پی پی) وزیراعظم محمد شہباز شریف پاکستان وآسٹریلیا نانیام اٹ ٹی ٹوئنٹی سیریز نااولیکو میچ اٹی سرسہبی آ پاکستانی کرکٹ ٹیم انا شاندار کارکڑد نا ستاءِ کرسا کرکٹ شونقی تے مبارکبادی تسنے۔ جمعہ نادے آپی ایم آفس  نا میڈیا ونگ آن جاری بیان نا رداٹ وزیراعظم محمد شہباز شریف پارے کہ پاکستانی کرکٹ ٹیم انا شاہینک خاص کر بالرآک شاندار گوازی اس نشان تسر۔ اوپارے کہ ٹیم اگہ ہنداوڑ لگن و خواری  کرسا کرے تو مچ آ سیریز ءِ کٹنگ نا لائخی تخک۔ وزیراعظم پارے کہ اسہ وخت اسے آن پد آسٹریلیا کون آ سوگو ٹیم انا برخلاف میچ اٹی سرسہبی بلاشبہ گوازی گر آتا خواری نا بھرم ءِ۔ اوپارے کہ چیئرمین پاکستان کرکٹ بورڈ محسن رضانقوی ، اونا ٹیم و کوچ آک ہم داسرسہبی آ ستاکڑزرہ۔ وزیراعظم سیریز نا بروک آ میچ آتیکن ہم پاکستانی کرکٹ ٹیم انا شاہین تیکن نیک است خواہی نا درشانی ءِ کرے۔