پی آئی اے نا عظمت رفتہ بحال مس، الس ءِ نئے بیرہ گچین سفری آسراتی فراوان مریک بلکن پاکستان نا پن ہم بڑزمریک، وزیراعظم محمد شہباز شریف نا حکومت و عارف حبیب کنسورشیم نا نیام اٹ ٹرانزیکشن نا دستاویز آتیا دستخط و ہل و تس نا دود آن تران

اسلام آباد۔ 29 جنوری (اے پی پی) وزیراعظم محمد شہباز شریف پی آئی اے نا نجکاری نا عمل شفاف وڑاٹ پورو مننگ آاست جمی نا درشانی ءِ کرسا دایخین نا درشانی ءِ کرینے کہ نجکاری آن پد پی آئی اے نا عظمت نا رفتہ بحال مس و الس ءِ نئے بیرہ گچین سفری آسراتی فراوان مریک بلکن پاکستان نا پن ہم بڑزمریک۔ او پنچ شنبے نادے آ داڑے پاکستان انٹرنیشنل ایئرلائنز نا نجکاری نا بابت حکومت و عارف حبیب کنسورشیم نا نیام اٹ ٹرانزیکشن نا دستاویز آتیا دستخط و ہل وتس نا دود آن تران کریکہ۔ داوخت آ نائب وزیراعظم و وزیرخارجہ محمد اسحاق ڈار ، وزیردفاع خواجہ محمد آصف، بنجائی وزیر حوالکاری و شینکاری عطاء اللہ تارڑ، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، وزیراعظم نا سلاہکار محمد علی تون اوار بڑزکو کمامدار آک ہم ساڑی ئسر۔ وزیراعظم دود آن تران کرسا پارے کہ اینو نا دود تاریخی اہمیت تخک ہراڑآ قوم ءِ مبارکبادی ایتیوہ، پی آئی اے نا نجکاری نا عمل شفاف وڑاٹ ایسر مس۔ اوپارے کہ عارف حبیب کنسورشیم نا ملکی صنعتی شونداری و شونہالی کن کڑد نمان ءِ۔ اودااومیت نا درشانی ءِ کرے کہ نجکاری آن پد پی آئی اے مسافر آتیکن آرام دہ سفر، اوفتا رکھ و شرف ءِ پک کیک۔ وزیراعظم پارے کہ پاکستان انٹرنیشنل ایئرلائن نا ہوابازی نا بشخ اٹی اہم ہند اس ئس و نئے بیرہ پاکستان بلکن مچ آ دنیا ٹی پی آئی اے ناستاء مسکہ و ‘‘گریٹ پیپل ٹو فلائی ود’’ نا سلوگن پی آئی اے نا پہچان ئس۔ وزیراعظم پارے کہ او پُراومیت ءِ کہ پی آئی اے نا عظمت رفتہ بحال مس، آسراتی تا گچینی آن ادارہ نا آب ہم گچین مریک۔ اونجکاری نا سرسہب عمل اٹی غٹ شریدار آتا کوشست آتیا اوفتا منت واری ءِ ہرفسا پارے کہ نائب وزیراعظم، فیلڈ مارشل و حکومتی ٹیم دا چرجوئی ٹی ہرا کڑد ءِ ادا کریر او بے مٹ ءِ، نجکاری نا عمل اٹی پبی بشخ ہلنگ آ کنسورشیم نا کڑد ہم ستاکڑزک۔ اوسلاہکار نجکاری محمد علی نا پرائیویٹائزیشن نا عمل اٹی اہم کڑد انا ستاءِ کرسا پارے کہ غٹ چیلنج آتا مون ءِ تورسا بے کچ شفاف وڑاٹ نجکاری پورو مس۔ وزیراعظم پارے کہ بولی نا مچ آ عمل ءِ براہ راست نشان تننگا، نجکاری آن پد  پی آئی اے آ زرکاری آن 55 ارب روپئی قومی خزانہ ٹی بریک۔ وزیراعظم پارے کہ اودے ہچ ءُ شک اس اف کہ کنسورشیم نا خواری و جوزہ غان پاکستان نا وقار بڑز مریک، الس ءِ نئے بیرہ گچین سفری آسراتی دُومریک بلکن پاکستان نا پن ہم بڑز مریک۔ چیئرمین کنسورشیم عارف حبیب دود آن تران کرسا پارے کہ اودے خوشی ءِ کہ پاکستانی زرکار آتے مون آ بننگ نا موقع اس فراوان کننگا، نن قومی کاز اکن تینے پیش کرین۔ اوپارے کہ 180 ارب روپئی نا زرکاری ٹی 125 ارب پی آئی اے نا گچینی آ خڑچ مریک۔ اوپارے کہ ملک اٹی کاروبار کن چاگڑد سازگار ءِ۔ میکرواکنامک سوگوی نا سوب آن زرکارآتا پت اٹی ودکی مسنے، بوئنگ کمپنی تون بے کچ فائدہ ئی گپ وتران مسنے، حکومتی سرپرستی آن زرکار آک پین جوان ءُ کاریم کننگ کیرہ، خذمت آتیٹی گچینی، سٹاف نا آسودہی و خراج کٹیا ٹی ودکی مریک اوباوری کرفے کہ او حکومت و الس نا اومیت آتیا پور وسلک و دے و نن خواری اٹ پی آئی اے نا عظمت رفتہ ءِ بحال کیک۔ وزیراعظم نا سلاہکار محمدعلی دود آن تران کرسا پارے کہ دستخط نا دود اسہ تاریخی ءُ حیثیت اس تخک، دا دود اصلاحات نا عمل اٹی ساڑی حکومت کن بھاز اہمیت تخک، کنسورشیم 180 ارب روپئی نا زرکاری کیک، زر انا 125 ارب پی آئی اے نا کاریم نا کچ اٹی ودکی آ خڑچ مریک وخت اس کہ 55 ارب روپئی حکومتی خزانہ ٹی جمع مریک۔ اوپارے کہ پی آئی اے نا نجکاری داہیت انا شاہدی ءِ کہ زرکارآک ملک اٹی زرکاری کن سنبرینگوک ءُ۔ داکان مست دود اٹی حکومتی و کنسورشیم نا نمائندہ غاتا کنڈآن نجکاری نا دستاویز آتیا دستخط کننگا۔