بنجائی وزیر واپار جام کمال خان روانڈا کافی فیسٹیول نا بناءِ کرے، دے ٹکی افریقہ تون اقتصادی کمکاری ءِ ودفنگ نا عزم انا درشان

اسلام آباد۔ 29 جنوری (اے پی پی) بنجائی وزیر واپار جام کمال خان پارینے کہ پاکستان و روانڈا نا کشاری زرگزران نا شریداری اٹ اسہ سوگو جہانی خور اسے نا سپلائی چین جوڑ مننگ کیک۔ بنجائی وزیر داخیال آتا درشانی ءِ او پنچ شنبے نادے آ اسلام آباد اٹی روانڈا کافی فیسٹیول نا بنانا وخت آ روانڈا نا وزیر واپار و صنعت پروڈنس سیبا ہیزی تون اوڑدہی کرے۔ کافی فیسٹیول نا بنائی دود آن تران اٹی بنجائی وزیر واپار جام کمال خان دے ٹکی افریقہ تون اقتصادی کمکاری ءِ ودفنگ نا پاکستان نا پکا عزم انا درشانی ءِ کرے۔ جام کمال روانڈا نا وزیر واپارو صنعت پروڈنس سیبا ہیزی تون ہم سرجمی اٹ اوڑدہی کرے ہراٹی ہڑتوم آ فریق آک براہ راست سپلائی چین جوڑ کننگ، کاروبار آن کاروباری رابطہ غاتے مون آ دننگ و واپار، کشت وکشار، مینو فیکچرنگ ، زرکاری و لاجسٹک نا بشخ آتیٹی کمکاری ءِ گیشتر کننگ آ امنا کریر۔ اوپیدواری کریر کہ پاکستان سالانہ کم و ود 3 ارب امریکی ڈالر نا چاہ درآمد کیک وخت اس کہ کافی نا کاریم اٹ اتنگ اٹی ہم ترندی اٹ ودکی مون آ بسنے۔ اوپارے کہ روانڈا نا بڑزکو آب انا کافی، مسابقتی نہاد آتا تعین و جغرافیائی خڑکی اودے قدرتی برتری فراوان کیک۔ جام کمال پارے کہ 250 ملین آن زیات آبادی نا مارکیٹ اتون پاکستان، نیامی ایشیا، دیکی چین و ہمسایہ ڈیہہ تیٹی روانڈا نا کافی نا برآمد آتیکن آخبت نا گیٹ وے نا وڑاٹ ہم کاریم کننگ کیک۔ داوخت آ گپ وتران کرسا روانڈا نا وزیر پروڈنس سیبا ہیزی پاکستان ءِ روانڈاکن اسہ بھلو گمانی منڈی اس گوندا۔ اوپارے کہ روانڈا کافی فیسٹیول روانڈانا پریمیئم کافی ءِ پاکستانی مارکیٹ اٹی درستی راستی کرفنگ نا اسہ بھلو حکمت عملی اسے نا بشخ ءِ۔ روانڈا نا وزیر افریقہ کن واپار و بشخنگ نا مرکز نا وڑاٹ روانڈا نا پوزیشن ءِ تالان کرے  ہراڑآن زرکارآتے افریقی کانٹی نینٹل فری ٹریڈ ایریا(AFCFTA)نا رداٹ 1.4ارب آن زیات مخلوق نا مارکیٹ اسکان رسینگ نا پیش کش کننگا۔ ہڑتوم آ وزیر آک واپاری و اقتصادی  کمکاری نا بابت سلاہ ئی مفاہمت نا یات داشت آپیش رفت نا ہم جاچ ءِ ہلکر۔ داکان بیدس لائٹ انجینئرنگ ، فارماسیوٹیکل ، کاسمیٹکس ، کشاری ازباب، کانڑکنی و معدنیات تون اوار اوار ٹیکنالوجی اٹ چلینگوک آ بشخ کون آ آئی ٹی ڈیجیٹلائزیشن و مصنوعی ذہانت اٹی کمکاری ءِ پین سوگو کننگ آ امنا کننگا۔