قائم مقام صدر سید یوسف رضاگیلانی تون انجینئرنگ ڈویلپمنٹ بورڈ انا چیف ایگزیکٹیو آفیسر حماد علی منصور نا اوڑدہی

اسلام آباد۔ 29 جنوری (اے پی پی) قائم مقام صدر سید یوسف رضاگیلانی تون انجینئرنگ ڈویلپمنٹ بورڈ انا چیف ایگزیکٹیو آفیسر حماد علی منصور پنچ شنبےنادے آ داڑے ایوان صدر اٹی اوڑدہی کرے۔ ایوان صدر نا میڈیا ونگ انا رداٹ داوخت آ گپ وتران کرسا سید یوسف رضاگیلانی پاکستان نا انجینئرنگ بشخ انا شونداری کن انجینئرنگ ڈویلپمنٹ بورڈ انا فعال کڑد انا ستاءِ کرے و چاگڑدی خدشہ غاتا رداٹ الیکٹرک گاڈی تا کنڈآ گدریفنگ نا اہمیت و پائیدار زرگزرانی شونداری نا مون آ دننگ نا گرج آ زور شاغا۔ قائم مقام صدر پارے کہ اسہ پاکستانی برانڈ اسے نا رداٹ ہندی وڑاٹ تیار کروک میڈاِن پاکستان گاڈی و اڑزان الیکٹرک بائیک درستی راستی کرفنگے تانکہ الس ءِ کم خڑچ و آسودہ سفری آسراتی فراوان کننگ مرے و ہندی صنعت ءِ مون آ دننگ مرے۔ قائم مقام صدر انجینئرنگ بشخ ءِ زرگزرانی شونداری و صنعتی پیش رفت نا اسہ اہم ءُ محرک اس گوندسا اونا پورو سرکاری سرپرستی ءِ برجاتخنگ نا عزم انا درشانی ءِ کرے۔ داکان مست حماد علی منصور قائم مقام صدر ءِ انجینئرنگ ڈویلپمنٹ بورڈ انا کڑد و مینڈیٹ آن معلومدار کرے ہرا وزارت صنعت  و پیداوار نا رداٹ اسہ بڑزکو ادارہ ءِ ہرادے 1995ٹی پاکستان نا انجینئرنگ سیکٹر ءِ سوگو جوڑ کننگ کن جوڑ کننگاسس۔ اوصنعتی شونداری نا مون آ دننگ، برآمد آتیٹی ودکی، پٹ وپول و شونداری نا کمکاری، تکنیکی مہارت آتیٹی گچینی و بشخ ءِ جہانی آب اتون ہم گرنچ کننگ کن ای ڈی بی نا اہم گام گیج آتیان معلومدار کرے۔