بنجائی وزیر جان جوڑی مصطفیٰ کمال تون مصر انا سفیر نا اوڑدہی

اسلام آباد۔ 29 جنوری (اے پی پی) بنجائی وزیر جان جوڑی مصطفیٰ کمال تون پاکستان اٹی مصر انا سفیر ڈاکٹر ایہاب عبدالحمید اوڑدہی کرے ہراٹی جان جوڑی نا بشخ اتون اوار ہڑتوم آکنڈآتا کمکاری  و تین پہ تینی است خواہی نا امور آ سرجمی اٹ  گپ وتران کننگا۔ اوڑدہی ٹی دواجوڑ کننگ نا بشخ اٹی کمکاری، کاریم نا کچ اٹی ودکی و دارداٹ برجاپیش رف نا ہم جاچ ءِ ہلنگا۔ بنجائی وزیر جان جوڑی پارے کہ پاکستان و مصر انا نیام اٹ سوگو، متکن و برادرانہ تعلقداری جوڑ ءِ، وخت اس کہ جان جوڑی نا بشخ اٹی کمکاری ہڑتوم آ ملک آتا ہڑتوم آ کنڈآتا تعلقداری نا اسہ اہم تمبہ اس جوڑمسنے۔ مصری سفیر داوخت آپارے کہ خاص کر جہانی ادارہ جان جوڑی (ڈبلیو ایچ او) کون آ فورم تیا پاکستان و مصر انا تین پہ تینی شریداری ستاکڑزوک و قابل تقلید ءِ۔ بنجائی وزیر جان جوڑی مصطفیٰ کمال جہانی ادارہ جان جوڑی نا 159 می دیوان اٹی مصر انا کنڈآن پیش کروک اِرا قرارداد آتا ستاءِ کرساپارے کہ پریسیژن میڈیسن و فیٹی لیور ناجوڑی نا بابت مصر انا گام گیج بے کچ وخت آ و جہانی جان جوڑی نا اولیت آتون ہم گرنچ ءِ۔ سفیر مصر ہڑتوم آ قرارداد آتیا پاکستان نا مخ تفی آ حکومت مصر انا کنڈآن خصوصی منت واری ءِ ہرفے۔ بنجائی وزیر جان جوڑی مصر انا کنڈآن زڑدوئی نا توننگ و درمان کن دوائی تا فراوانی ٹی کمکاری نا ہم ستاءِ کرے و پارے کہ پاکستان اٹی مون انگا زڑدوئی نا چٹفنگ کن مصر انا مثل ننکن اسہ رول ماڈل اسے نا حیثیت تخک۔