وزیراعظم شہباز شریف تون یورپی یونین نا سفیر نا اوڑدہی، وزیراعظم نا پاکستان و یورپی یونین نا نیام اٹ واپار نا مون آ دننگ اٹی جی ایس پی پلس اسکیم نا اہم کڑد آ زور

اسلام آباد۔ 29 جنوری (اے پی پی) وزیراعظم محمد شہباز شریف پاکستان و یورپی یونین نانیام اٹ تین پہ تینی است خواہی نا غٹ بشخ خاص کر واپار ، زرکاری، شونداری و سلامتی ،مائیگریشن و موسمیاتی بدلی نا بشخ آتیٹی کمکاری ءِ پین سوگو کننگ نا عزم انا درشانی ءِ کرسا پاکستان و یورپی یونین نا نیام اٹ واپار نا مون آ دننگ اٹی جی ایس پی پلس اسکیم نا اہم کڑد آ زور شاغانے۔ وزیراعظم آفس نا میڈیا ونگ اناکنڈآن جاری بیان نا رداٹ وزیراعظم محمد شہباز شریف تون یورپی یونین نا پاکستان اٹی سفیر رائمونڈاس کارو بلس پنچ شنبے نادے آ داڑے اوڑدہی کرے۔ داوخت آنائب وزیراعظم ووزیرخارجہ سینیٹر محمد اسحاق ڈار ، وزیراعظم نا سلاہکار ڈاکٹر سید توقیر شاہ ، وزیراعظم نا خصوصی کمکار طارق فاطمی و سیکرٹری خارجہ آمنہ بلوچ ئسک ہم وزیراعظم تون اوار ساڑی ئسر۔ وزیراعظم یورپی یونین نا سفیر تون گپ وتران کرسا پارے کہ پاکستان یورپی یونین تون تین پہ تینی فائدہ غاتیا تالان واپاری تعلقداری خاص کر جی ایس پی پلس نا رداٹ واپار نا مون آدننگ نا گام گیج آتیا خڑکی کمکاری کن سنبرینگوک ءِ۔ وزیراعظم یورپی یونین نا سفیر ہرا منہ تُو مست پاکستان اٹی تینا زمواری تے سنبھالانے، نا خیرمقدم ءِ کرے۔ وزیراعظم پاکستان و یورپی  یونین نا نیام اٹ تین پہ تینی است خواہی نا غٹ بشخ خاص کر واپار، زرکاری، شونداری ،و سلامتی ، مائیگریشن و موسمیاتی بدلی نا بشخ آتیٹی کمکاری ءِ پین سوگو کننگ نا عزم انا درشانی ءِ کرے۔ اوپاکستان و یورپی یونین نا نیام اٹ واپار نا مون آدننگ اٹی جی ایس پی پلس اسکیم نا اہم کڑد آ زور شاغساپارے کہ حکومت پاکستان یورپی  یونین تون خاص کر جی ایس پی پلس نا کمک اٹ تین پہ تینی فائدہ غاتیا تالان واپاری مون آ دننگ نا گام گیج آتیا خڑکی کمکاری کن سنبرینگوک ءِ۔ وزیراعظم تدوک آسال نومبر اٹی برسلز اٹی اڈ ہلوک پاکستان۔ یورپی یونین سٹریٹجک ڈائیلاگ نا ہفت می دور آ ہم است جمی نا درشانیءِ کرے ہراٹی پاکستانی ڈل انا کماشی ءِ نائب وزیراعظم ووزیرخارجہ سینیٹر محمد اسحاق ڈار کریسس۔ یورپی یونین نا سفیر پاکستان آ بننگ آن پد وزیراعظم نا کنڈآن ملوک  آ جم وجوش اٹ بخیر آ منت واری نا درشانی ءِ کرے و باوری کرفے کہ او پاکستان و یورپی یونین نا تعلقداری تے غٹ بشخ آتیٹی پین سوگو کننگ کن پبی کڑد ادا کرساکیک۔ اویورپی یونین نا سرکڑدہ غاتا کنڈآن وزیراعظم کن نیک است خواہی نا کلہو ہم سرکرے وپارےکہ یورپی یونین جی ایس پی پلس نا رداٹ واپار نا مون آ دننگ تون اوار اوار واپاری سرجزبشمول اپریل اٹی اڈہلوک آ اولیکو یورپی یونین ۔پاکستان بزنس فورم نا کمک اٹ پاکستان تون خڑکی رابطہ غاتے کن سنبرینگوک ءِ۔