صدر مملکت آصف علی زرداری نا ’ڈی پی ورلڈ‘ انا گروپ چیئرمین و چیف ایگزیکٹیو آفیسر سلطان احمد بن سلیم تون اوڑدہی

دبئی۔ 28 جنوری (اے پی پی) صدر مملکت آصف علی زرداری ’ڈی پی ورلڈ‘ نا گروپ چیئرمین و چیف ایگزیکٹیو آفیسر سلطان احمد بن سلیم تون اوڑدہی کرے، اوڑدہی ٹی پاکستان و ڈی پی ورلڈ نا نیام اٹ ودوک آ کمکاری نا جاچ ءِ ہلنگا و داہیت آ امنا کننگا کہ ساڑی آبین الحکومتی معاہدہ ہڑتوم آ کنڈآتا سوگو عزم انا عکاسی ءِ کیک۔ چارشنبے  آ ایوان صدر نا پریس ونگ آن جاری بیان نا رداٹ صدر آصف علی زرداری پاکستان تون ڈی پی ورلڈ نا سوگو و پائیدار شریداری و ملک انا لاجسٹک، بندرگاہ تا آپریشن و انفراسٹرکچر آتیٹی اونا کڑد انا ستاءِ کرے۔ صدر مملکت پارے کہ دا گام گیج پاکستان نا دا ہدف نا رداٹ ءِ ہرانا رداٹ ملک ءِ گچین رابطہ وپوسکن آ لاجسٹک انفراسٹرکچر نا کمک اٹ علاقائی واپار و ٹرانزٹ نا ہند انا وڑاٹ منفنگ ءِ۔ سلطان احمد بن سلیم جہانی غیریقینی حالیت آتا دا دور اٹی پاکستان نا تزویراتی (اسٹریٹجک) اہمیت ءِ مون آ تخا و داہیت آ زور شاغاکہ سمندری کسر تیا ودوک  آ زور انا رداٹ پاکستان اسہ اہم ءُ حیثیت اس تخک۔ اوپارے کہ چین و نیامی ایشیا تون پاکستان نا براہ راست رابطہ ، بحیرہ عرب اسکان رسینگ و سڑک و ریلوائی نا نیٹ ورک نا کمک اٹ ڈغاری رابطہ اودے علاقائی واپار و جہانی رابطہ کاری نا اسٹریٹجک مرکز اٹی اتیک۔ اومستی پارے کہ پاکستان سمندر و ڈغار نا کمک نا کمک اٹ دنیا نا اہم بشخ آتے گنڈوک آ اسہ قدرتی ءُ مرکز اسے۔ اوداعزم انا درشانی ءِ کرے کہ متحدہ عرب امارات دہائی تیا تالان پت انا قابل و متکن آ تعلقداری تا بنداو آ پاکستان تون خڑکی کمکاری ءِ برجاتخک۔ صدر مملکت آصف علی زرداری پارٹنر ادارہ غاتے ادارہ جاتی آسراتی و تیز رفتار منظوری تا فراوانی کن حکومتِ پاکستان نا عزم انا درشانی ءِ کرے و ریل فریٹ نا جدید کاری، ان لینڈ لاجسٹک و مربوط فریٹ کوریڈور آتیٹی مریس مدی کمکاری ءِ پین بھلن کننگ نا اہمیت آ زور شاغا۔ اوڑدہی ٹی متحدہ عرب امارات اٹی پاکستان نا سفیر ہم ساڑی ئسک۔