وزیراعظم نا لیپ ٹاپ اسکیم میرٹ و کارکڑد نا چیدہ ءِ، بنجائی وزیر ریلوائی محمد حنیف عباسی نا راولپنڈی ٹی دود آن تران

راولپنڈی۔ 29جنوری (اے پی پی) بنجائی وزیر ریلوائی محمد حنیف عباسی پارینے کہ مستین اٹی سیاسی راہشون تا تقریر بظاہر بھا  ز اثرآن پُر مسرہ ولے اوفتا ہچ ءُ عملی نتیجہ اس مون آ بتوکہ، وخت ا س کہ نن تینا راہشون تیا نعرہ آخا بلکن کارکڑد نا بنداو آ گمر کینہ۔ او پنچ شنبے نادے آپیر مہر علی شاہ بارانی کشاری یونیورسٹی ٹی وزیراعظم نا لیپ ٹاپ اسکیم نا دود آن تران کریکہ۔ اوپارے کہ لیپ ٹاپ اسکیم ءِ چندی سیاسی راہشونک تنقید نا شست کریر، ولے حقیقت دادے کہ دا اسکیم حقدار و لائخ آ طالب علم آتیکن ءِ، و دا خیرات اس اف بلکن طالب علم آتا خواری نا صلہ ءِ۔ محمد حنیف عباسی پارے کہ دا اسکیم ہمووخت آ بناکننگا ہراتم شہباز شریف وزیراعلیٰ پنجاب ئس، و اونا مسخت ورناتے پوسکن آ خواست آتون ہم گرنچ کننگ ئس۔ اوپارے کہ استاد آتا شرف بھاز المی ءِ انتئے کہ گچین تربیت ہی اسہ سوگو قوم اسے نا بنداو جوڑمریک۔ بنجائی وزیر پارے کہ ننا سرکڑدہ غاتا کماشی ٹی میٹروبس ڈٹ ءِ پورو کننگا، ہراٹی سفر کروک آ 70 درسد بندغ آتا تعلق تعلیمی بشخ اتون ءِ۔ اوپارے کہ مانچسٹر و برمنگھم اٹی ’’ ستھراپنجاب‘‘ ڈٹ ءِ بطور ماڈل اسٹڈی کننگ انگ ءِ ہرا پاکستان کن گمر نا سوب ءِ۔ اوپارے کہ پاکستان ریلوائی 10 ارب روپئی نا کٹیا کرینے، 70 ریلوائی اسٹیشن تے ڈیجیٹل کننگانے  وخت اس کہ ریلوائی اسٹیشن و پرائم ٹرین تیٹی وائی فائی نا آسراتی ہم فراوان کننگانے۔ اوپڑوکرے کہ ہزارہ ڈویژن آن سال انا ایسر اسکان پوسکن آ ریلوائی ٹریک نا بناءِ کننگ انگ ءِ و پاکستان ریلوائی ءِ نیامی ایشیائی ریات آتون گنڈنگ نا ڈٹ آتا بنداو ہم ہندا سال انا ایسر اٹی تخنگک۔