بنجائی وزیر عبدالعلیم خان نا این ایچ اے ءِ کرتارپور و ننکانہ صاحب ءِ موٹرویز نیٹ ورک تون گنڈنگ کن اہم گام گیج آتا پارت

اسلام آباد۔ 29 جنوری (اے پی پی) بنجائی وزیر مواصلات عبدالعلیم خان نیشنل ہائی وے اتھارٹی (این ایچ اے) ءِ کرتار پور و ننکانہ صاحب ءِ موٹرویز نیٹ ورک اتون گنڈنگ کن اہم گام گیج آتا پارت کرینے۔ سیالکوٹ آن کرتارپور اسکان جوڑ مروک آ دا پوسکن آ موٹروے ءِ ’’گرونانک ایکسپریس وے‘‘ نا پن اٹ کننگک۔ پنچ شنبے نادے آداڑے اسہ بڑزکو کہول انا دیوان اسے نا کماشی ءِ کرسا بنجائی وزیر عبدالعلیم خان پارے کہ این ایچ اے نا ننکانہ صاحب و کرتارپور نا بابت ڈٹ ڈیہہ اکن ’گیم چینجر‘ جوڑمریک۔ اوپارت کرے کہ سیالکوٹ آن کرتارپور موٹروے نا تفنگ کن دمدستی وڑاٹ کاریم نا بناءِ کننگے۔ عبدالعلیم خان ڈٹ انا سرجم آتے پارسا پارے کہ کرتارپور ہائی وے نا دامون ایمون زائر و سیل وسواتی تا آسراتی کن تھری، فور و فائیو اسٹار ہوٹل جوڑ کننگک۔ داکان بیدس موٹروے آ گچین ریسٹ ایریہ و جہانی آب انا شاپنگ مالز آتا تفنگ ءِ ہم پک کننگک۔ بنجائی وزیر مستی پارے کہ سکھ کمیونٹی ءِ دا ڈٹ آتیٹی زرکاری نا ترغیب تننگ کن لندن، کینیڈا و امریکہ کون آ ملک آتیٹی بھلو کچ اسے آ تشہیری مہم چلیفنگک و این ایچ اے دا ڈٹ آتے جہانی روڈ شوزاٹی ہم پیش کیک تانکہ جہانی کہول آ مارکیٹنگ نا کمک اٹ درملکی زرکاری دوئی کننگ مرے۔