وزیراعظم ناخصوصی کمکار صنعت و پیداوار تون سری لنکا نا وزارتی ڈل انااوڑدہی ، چندی بشخ آتیٹی تین پہ تینی کمکاری ءِ ودفنگ آ گپ وتران

کولمبو۔ 29جنوری (اےپی پی) وزیراعظم نا خصوصی کمکار خصوصی صنعت و پیداوار ہارون اخترخان پنچ شنبے نادے آ سری لنکا نا بڑزکو کہولی وزارتی ڈل اتون اوڑدہی کرے، ہراٹی ہڑتوم آکنڈآتا تعلقداری خاص کر واپار، صنعت، زرکاری و پوسکن آٹیکنالوجی نا بشخ آتیٹی کمکاری ءِ ودفنگ آ سرجمی  اٹ گپ وتران کننگا ۔ صنعت و پیداوار نا کنڈآن جاری بیان نا رداٹ اوڑدہی ٹی سری لنکا نا وزیر واپار و سنتھاسمراسنگھ، وزیر صنعت سنیل ہندانیٹھی و نائب وزیرجان جوڑی مدیتھاہنسنکائسک شریک ئسر۔ فریق آک صنعت و واپار، سمال اینڈ میڈیم انٹرپرائزز(SMEs)، کاروباری وارخواہی، زرکاری نا مون آ دننگ و ٹیکنالوجی نا بشخ اٹی شریداری عمل آ جوان گپ وتران کریر۔ داوخت آ خصوصی کمکار ہارون اخترخان پارے کہ وزیراعظم پاکستان نا وژن نا رداٹ ڈیہہ اٹی زرگزرانی کمکاری، تین پہ تینی واپار و زرکاری نا مون آدننگ ءِ اولیت تننگ انگ ءِ۔ اوپارے کہ پاکستان و سری لنکا نا تاریخی و برادرانہ تعلقداری تین پہ تینی شرف و پت آ تالان ءِ، ہرادے داسہ اسہ اسٹریٹجک اکنامک پارٹنر شپ اٹی بدل کننگ نا است خواہی ءِ۔ ہارون اخترخان مستی پارے کہ ہڑتوم آملک آتا نیام اٹ دہائی تیا تالان سنگتی داسہ عملی زرگزرانی کمکاری، ڈیجیٹل اکانومی وپوسکن آ ٹیکنالوجی نا بشخ آتسکان تالان مننگ ءِ، ہرا ڈیہہ اٹی پائیدار شونداری کن اہم جوڑمریک۔ سری لنکا نا وزیر واپار و سنتھاسمراسنگھ داوخت آپارے کہ پاکستان و سری لنکا نا سنگتی وخت انا کسوٹی آ پورو سلیسنو و داسہ دا تعلقداری سوگو زرگزرانی شریداری ٹی بدل مننگ ءُ۔ وزیر صنعت سنیل ہندا نیٹھی پارے کہ ہڑتوم آ ملک آک واپار، زرکاری و صنعتی کمکاری ٹی پوسکن ءُ کسر مننگ ءُ، ہراڑآن نجی بشخ ءِ ہم فائدہ رسینگک ۔ سری لنکا نا نائب وزیرجان جوڑی مدیتھا ہنسنکا پارے کہ ہڑتوم آملک آتا الس نا نیام اٹ خڑکی و متکن آ تعلقداری ساڑی ءِ، ہرا حکومتی کہول آ کمکاری ءِ پین سوگو کننگ اٹ اہم کڑد اداکیک۔ ہڑتوم آ فریق آک تین پہ تینی کمکاری ءِ پین ودفنگ، اسیجائی ڈٹ آتا مون آ دننگ و علاقائی زرگزرانی سوگوی کن اواری اٹ کاریم کننگ نا عزم انا درشانی ءِ کریر۔