قائم مقام چیئرمین سینیٹ سیدال خان نا آرآئی یو جے نا پوسکن گچین مروک آ عہدیدار آتے مبارکباد

اسلام آباد۔ 29جنوری (اے پی پی) قائم مقام چیئرمین سینیٹ سیدال خان راولپنڈی/اسلام آباد یونین آف جرنلسٹس (آر آئی یوجے) نا سالانہ گچین کاری 2026 نا سرسہب و جوانی اٹ اڈتننگ آ پوسکن گچین مروک آ عہدیدار آتے مبارکبادی پیش کرینے۔ سینیٹ سیکرٹریٹ نا کنڈآن جاری بیان نا رداٹ او غٹ عہدیدار آتا بے مقابلہ غان گچین مننگ ءِ صحافی برادری نا پت و سیوت نا درشا نی گوندا۔ قائم مقام چیئرمین سینیٹ صدر گچین مننگ آآصف بشیر چوہدری، نائب صدور توصیف عباسی و رشیدملک، جنرل سیکرٹری بشیر عثمانی، فنانس سیکرٹری اظہار خان نیازی، جوائنٹ سیکرٹریز راجہ عمران جنجوعہ و رانا فرحان اسلم ءِ خصوصی وڑاٹ مبارکبادی ترسا اوفتے کن نیک است خواہی نا درشانی ءِ کرے۔ اوایگزیکٹیو کونسل نا پوسکن گچین مروک آ باسک عائشہ ناز، علی اختر، نوابزادہ شاہ علی، شہزاد راجپوت، حمید عباسی، اسد شرر، غفران چشتی، نور ایمن زہرا، اعجاز احمد فکری و دوست محمد ءِ ہم مبارکبادی پیش کرے و اومیت ظاہر کرے کہ او صحافی برادری نا راجی آسودہی کن فعال کڑد ادا کیرہ۔ سیدال خان پارے کہ صحافی راج اٹی جمہوری قدر انا سوگوی ، آجوئی درشانی نا مون آدسننگ و الس ءِ باخبرتخنگ اٹ تمبہ نا حیثیت تخک۔ اودااومیت نا درشانی ءِ کرے کہ پوسکن گچین مروک آ سرکڑدہ صحافی تا مون تروک ویل آتا ایسری، اوفتا حق انا رکھ و صحافتی آب انا گچینی کن پبی جہد ءِ برجاتخک۔ قائم مقام چیئرمین سینیٹ آرآئی یوجے نا پوسکن گچین مروک آ سرکڑدہ غاتیکن نیک است خواہی نا درشانی ءِ کرسا پارے کہ دا گچین کاری یونین نا باسک آتا پت و یکجہتی نا پیدوار چیدہ ءِ۔