بنجائی وزیر قیصر احمد شیخ تون سلک وے امپیکس و چینی بی آر آئی ڈل انا اوڑدہی

اسلام آباد۔ 29 جنوری (اے پی پی) بنجائی وزیر بورڈ آف انویسٹمنٹ قیصر احمد شیخ تون پنچ شنبے نادے آ سلک وے امپیکس و چین نا بیلٹ اینڈ روڈ انیشی ایٹیو(بی آرآئی) تون وابستہ بڑزکو کہولی چینی ڈل اس اوڑدہی کرے۔ اوڑدہی ٹی پاکستان و چین نا نیام اٹ ہڑتوم آ کنڈآتا زرکاری، اقتصادی کمکاری، و آخبت نا اسیجائی ڈٹ آتیا سرجمی اٹ گپ وتران کننگا۔ زرکاری بورڈ اناکنڈآن جاری بیان نا رداٹ بنجائی وزیر قیصر احمد شیخ داوخت آپارے کہ پاکستان و چین نا سنگتی متکن، آزموندہ و سوگو بنداوتیا جوڑ ءِ، ہرا وخت اتون پین سوگو مننگ ءِ ۔ اوپارے کہ حکومت پاکستان چین اتون اقتصادی شریداری ءِ پین ودفنگ و زرکاری نا پوسکن وارخواہی ودی کننگ کن سنبرینگوک ءِ۔ قیصر احمد شیخ چینی ڈل ءِ پاکستان اٹی معدنیات، کشت وکشار، انفارمیشن ٹیکنالوجی ، ڈیجیٹلائیزیشن و ویلیو ایڈڈ بشخ آتیٹی زرکاری نا گیشتر گمان تیان معلومدار کرے۔ او زوت آتے اٹ پاک۔ چین معدنی کمکاری فورم نا حوالہ ءِ ترسا پارے کہ پاکستان نا معدنی بشخ بھلا لائخی تا حامل ءِ و دا بشخ اٹی درملکی زرکاری ءِ خصوصی اہمیت تننگ انگ ءِ۔ بنجائی وزیرپارے کہ چینی ڈل خاص کر چاندی و ایلو اسٹریٹجک معدنیات آتیٹی زرکاری ٹی بھاز است خواہی ظاہرکرینے، ہراپاکستان نا صنعتی شونداری و برآمد آتا مون آ دننگ اٹ اہم کڑد ادا کننگ کیک۔ چینی ڈل انا کماشی ءِ مسٹر ڈینگ یوبن ، ہیڈ بی آرآئی، صوبہ یونان کریکہ۔ داوخت آ ایڈیشنل سیکرٹری بورڈ آف انویسٹمنٹ ڈاکٹر ارفع اقبال ڈل ءِ پاکستان نا زرکاری نا اولیتی بشخ، کمکاری نا نظام و ون ونڈو آپریشن نا بابت سرجمی اٹ حوال تس۔ سلک وے امپیکس نا چیف جیالوجسٹ پروفیسر ہائیتا ؤیوان معدنی بشخ اکن اسہ مریس مدی وژن اس پیش کرساپاکستان اٹی پائیدار و پوسکن بنداو تیا معدنی شونداری نا گمان تے تالان کرے۔ بنجائی وزیر قیصر احمد شیخ داعزم انا درشانی ءِ کرے کہ حکومت پاکستان درملکی زرکارآتے ہرممکن آسراتی ، شفاف پالیسی فریم ورک و زرکاری دوست چاگڑد اس فراوان کننگ کن پورو وڑاٹ سنبرینگوک ءِ۔