وادی تیراہ ٹی ہچ ءُ وڑاسے نا آپریشن مفننگ ءِ، وزیر مملکت طلال چوہدری

اسلام آباد۔ 28 جنوری (اے پی پی) وزیرمملکت امور داخلہ سینیٹر طلال چوہدری پیدوار کرینے کہ وادی تیراہ ٹی ہچ ءُ وڑاسے نا فوجی آپریشن مفننگ ءِ، حکومت غٹ فیصلہ غاتے السی مفاد و ہندی آبادی ءِ پت اٹ ہلسا کننگ آ یخین تخک۔ چارشنبے نادے آ تینا اسہ بیان اسے ٹی وزیر مملکت پارے کہ وادی تیراہ نا بابت تالان کروک آخبر آک راستی تیا تالان افس، بلکن اسہ مخصوص سیاسی بیانیہ نا رداٹ قومی ادارہ غاتا پن ءِ ہلنگ انگ ءِ تانکہ انتظامی امور اٹی مروک آ مبینہ بے ڈولی تیان چکار ءِ اسہ کنڈ کننگ مرے۔ اوپارے کہ بنجائی حکومت و سیکورٹی ادارہ غاک ملک اٹی امن و ایمنی کن سنبرینگوک ءُ و پوسکن ءُ گام اس غٹ اسٹیک ہولڈر آتے آن بورڈ ہلسا ہرفنگک۔ اوپارے کہ وادی تیراہ غان مخلوق نا گدریفنگ و دامد اٹی جتا کروک آچار ارب روپئی نا زر انا شفافیت ءِ پک کننگ المی ءِ، انتئے کہ ہندن کہ دا زر ءِ جاری کننگا ، ہموکان منفی پروپیگنڈا نا بناءِ کننگا تانکہ اصل راستی تے اودیم کننگ مرے۔ وزیر مملکت پارے کہ اگہ ملک انا اسہ بشخ اسے ٹی انٹیلی جنس معلومداری  نا بنداو آ کارروائی اس کننگک تو او نیشنل ایکشن پلان نا بشخ ءِ، ہراڑآ غٹ سیاسی جماعت آک بشمول خیبرپختونخوا نا ساڑی آ صوبائی حکومت نا پور و امنائی سلاہ ساڑی ءِ۔ اوداہیت آ زور شاغا کہ نیشنل ایکشن پلان نا رداٹ مروک آ ہرعمل اٹی صوبائی حکومت پورو وڑاٹ حصہ دار و باخبر مریک۔ او السءِ باوری کرفے کہ حکومت نا اولیت شفافیت و امن ءِ۔ یات سلے کہ بنجائی حکومت نا دا موقف وادی تیراہ نا الس نا رکھ و علاقائی سوگوی ءِ پک کننگ نا پکا عزم انا عکاسی ءِ کیک۔