بنجائی وزیر رانا تنویر حسین نا کماشی ٹی نیشنل وہیٹ اوورسائٹ کمیٹی نا چارمیکو دیوان

اسلام آباد۔ 28 جنوری (اے پی پی) بنجائی وزیر قومی غذائی رکھ وپٹ وپول رانا تنویر حسین نا کماشی ٹی نیشنل وہیٹ اوورسائٹ کمیٹی نا چارمیکو دیوان اڈ ہلک ہراٹی ملک اٹی جم خولم نا حالیت 2026 کن خولم نا ہلنگ نا ڈٹ، ساڑی آ کوڑی تا دوئی کننگ، بین الصوبائی ہم گرنچی و منڈی نا سوگوی نا جاچ ءِ ہلنگا۔ دیوان اٹی غٹ صوبہ و تعلقدار بنجائی ادارہ غاتا نمائندہ غاک بشخ ہلکر ۔ کمیٹی مچ آ ملک اٹی خولم نا رسینگ نا حالیت آتا سرجمی اٹ جاچ ءِ ہلک و داہیت آ است جمی نا درشانی ءِ کرے کہ ساڑی غذائی سال اکن قومی گرج آتے پورو کننگ کن خولم نا بھلو کوڑی اس دوئی ارے۔ پیدوار وڑاٹ پاننگاکہ خولم نا ہچ ءُ کاختی اس اف و بروک آ فصل انا گڈنگ اسکان خولم نا بے سلنگ آن دوئی کننگ ءِ پک کننگ کن جوان بست وبند ساڑی ارے۔ کمیٹی صوبائی کہول آ خولم نا ہلنگ نا حکمت عملی تیا ہم سجفے و بزغرآتے استحصال آن بچفنگ نا اہمیت آ زور شاغا۔ صوبہ غاک دیوان ءِ معلومدار کریر کہ بزغرآتے انصاف اٹ زرگزرانی کٹیا ترفنگ کن خاص کر ضلعی کہول آ گچین چاروکی و عملدرآمد نا گام گیج کننگ انگ ءِ۔ خولم نا ہلنگ اٹی نجی بشخ انا کڑد انا ہم جاچ ءِ ہلنگا و باوری کرفنگا کہ بزغرآتا فائدہ غاتا رکھ اکن ضابطہ جاری وڑوڈول نافذ ءِ ۔ بین الصوبائی ہم گرنچی دیوان نا اسہ اہم ٹک اس ئس۔ بنجائی وزیر پارت کرے کہ صوبہ غاتا نیام اٹ کمکاری نا کمک اٹ ہلنگ نا بست وبند آتے آسان کننگے ہرافتے ٹی کارکڑد و آسراتی عمل کن جوان ہلنگ علاقہ غاتا تخصیص ہم اوار ءِ۔ دا گام گیج آتا مسخت اسیجائی ڈٹ بندی و ہم گرنچی نا کمک اٹ قومی غذائی رکھ ءِ سوگو کننگ ءِ۔ دیوان اٹی ساڑی ربیع سیزن 2025-26اٹی  خولم نا بوائی نا پیش رفت انا ہم جاچ ءِ ہلنگا۔ صوبہ غاک است بڈ رجحان تا حوال تسر ہرا بزغر آتا پت و گچین کشاری وڑوڈول نا عکاسی ءِ کیک۔ ساڑی آ ٹک آتا بنداو آ برجاسال اٹی کشاری نمو سوگو مننگ نا گمان ءِ۔ بنجائی وزیر غذائی رکھ ءِ پک کننگ، خولم نا منڈی تے سوگو تخنگ، بزغرآتا رکھ و جوان سٹریٹجک کوڑی تے برقرار تخنگ کن حکومت نا عزم انا درشانی ءِ کرے۔ غٹ صوبہ غاک کمیٹی ءِ باوری کرفیر کہ خولم بھلو کوڑی اس دوئی ءِ و خولم نا رسد اٹی ہروڑنا گمانی اڑاند آتیان بچنگ کن وخت آ و گچین گام گیج کننگانے۔