این ایف سی ایوارڈ نا رداٹ خیبرپختونخوا ءِ اونا بشخ باقاعدگی اٹ ملنگءِ، بنجائی وزیر انجینئر امیر مقام و گورنر خیبرپختونخوا فیصل کریم کنڈی نا میڈیا تون گپ وتران

اسلام آباد۔ 28 جنوری (اے پی پی) بنجائی وزیر امور کشمیر وگلگت بلتستان و سیفران انجینئر امیر مقام و گورنر خیبرپختونخوا فیصل کریم کنڈی ئسک پارینو کہ این ایف سی ایوارڈ نا رداٹ خیبرپختونخوا ءِ اونا بشخ باقاعدگی اٹ ملنگ ءِ، اودے ہمو بشخ ملک ہرا ایلو صوبہ غاتے تننگک ، امن ، شونداری و شونہالی کن بنجا و صوبہ غاتے اواری اٹ کاریم کروئی مریک، مرکز آ دوبہ خلنگ نا جاگہ غا عملی گام گیج کننگے، دہشت گردی نا باندات آ سیاست آخا قومی یکجہتی نا گرج ءِ، خیبرپختونخوا حکومت نا کنڈآن خولم تنکی آ بنجاتون ہیت کننگ نا جاگہ غا دوبہ خلنگ انگ ءِ ، ریاست مخالف آتون مذاکرات و بنجاغان انکار دا ہیت جوان اف، الس نا ویل آتے پدپشت تخسا ہر ہیت انا بناءِ بندی 804انا پن آن کننگک۔ داخیال آتا درشانی ءِ اوفک چارشنبے نادے آ اسلام آباد اٹی میڈیا تون گپ وتران کریر۔ بنجائی وزیر انجینئر امیر مقام پارے کہ خیبرپختونخوا حکومت نا ہر باندات ءِ سیاست نا گواچی کننگ ملکی فائدہ غاتا برخلاف ءِ، دہشت گردی اسہ جماعت یا حکومت نا اف مچ آ قوم انا ویل ءِ، دہشت گردی نا باندات آ سیاست آخا قومی یکجہتی نا گرج ءِ۔ اوپارے کہ فاٹا نا قبائلی مشران آتون گپ وتران حکومت نا کمک اٹ ممکن ءِ، راستی مون آمرسا باندات ءِ غلط رنگ تننگ جوان اف، ڈپٹی کمشنر، کمشنر و سرکاری نمائندہ غاک پدریسہ مذاکرات اٹی اوار مرسا کرینو ، کابینہ ٹی 4 ارب روپئی نا منظوری نا فیصلہ پیدوار ءِ ، الس ءِ ریفسا خوف تالان کننگ ناانصافی ءِ۔ انجینئر امیر مقام پارے کہ انٹیلی جنس بیسڈ آپریشن مچ آملک اٹی اسہ ہی پالیسی نا رداٹ مننگ ءِ، خیبرپختونخوا ٹی آپریشن نا پالیسی ٹی ہچ ءُ بدلی اس اف، اگہ انٹیلی جنس بیسڈ آپریشن نا گیگ بدل ءِ تو پاننگے۔ اوپارے کہ پی ٹی آئی 12 سال انا حکومت آن پد ہم امن نا گیگ بدل ءُ کسر اس تتو ، دہشت گردی نا برخلاف ڈبل سٹینڈرڈ قابل قبول اف، صوبہ نا الس تون ناانصافی مننگ ءِ، وزیراعلیٰ مچ آ خیبرپختونخوا نا نمائندہ ءِ بیرہ اسہ نعرہ نا اف، صوبہ ٹی دہشت گردی، زرگزران و السی ویل ارے ، مرکز آ دوبہ خلنگ نا جاگہ غا عملی گام گیج کننگے۔ بنجائی وزیرپارے کہ این ایف سی ایوارڈ نا رداٹ خیبرپختونخوا ءِ اونا بشخ باقاعدگی اٹ ملنگ ءِ، خیبرپختونخوا ءِ ہمو بشخ ملک ہرا ایلو صوبہ غاتے تننگک۔ وسیلہ غاتا کاریم اٹ اتنگ نا حساب الس نا مون آ تخنگے، سیاست غٹ انا حق ءِ ولے ویل آتا ایسری نشان تننگ ہم المی ءِ۔ بنجائی وزیر انجینئر امیر مقام پارے کہ پی ٹی آئی ہر گڑاغا سیاست کننگ ءِ ، صوبہ نا الس تون ظلم کننگ انگ ءِ، الس نا ویل آتے پدپشت تخسا ہر ہیت انا بناءِ بندی 804 نا پن آن کننگک۔ اوپارے کہ تیراہ نا باندات آ گمراہ کن پروپیگنڈا کننگا، اونا کابینہ ٹی ہیت بس مچ آ باندات مون آ بس، دہشت گردی نا باندات بھاز سنگین ءِ ، داڑآ غٹ اسٹیک ہولڈر آتون اواری اٹ فیصلہ کننگ نا ءِ، انٹیلی جنس بیسڈ آپریشنز مچ آملک اٹی مننگ ءِ، انٹیلی جنس بیسڈ آپریشن اگہ فوج کپ تو ارٹ میکو ایسری انت ءِ؟ نناپار۔ بنجائی وزیر پارے کہ پی ٹی آئی حکومت تینا صوبہ ٹی لاء انفورسمنٹ ایجنسی تے سوگو کننگ کن کننگا؟نی بیرہ بندی 804 نا وزیراعلیٰ افیس، نی مچ آ صوبہ نا وزیراعلیٰ اُس، وزیراعلیٰ نا کاریم دااف کہ وخت اس لاہور و وخت اس کراچی آ کائے، اسہ انسان اسے مون آ تخسا بیان تننگ روا اف۔ اوپارے کہ دہشت گردی نا ویل غٹ انا ویل ءِ ، داڑآ سیاست بایدے کننگپ، تیراہ ٹی آپریشن اگہ مننگ ءِ تو او انٹیلی جنس بیسڈ آپریشن ءِ، ہراڑے دہشت گردآتا حوال بریک ہموڑے آپریشن مریک۔ اوپارے کہ ہرا بشخ خیبرپختونخوا نا این ایف سی ایوارڈ اٹی جوڑ مریک او ہرتُو خیبرپختونخوا ءِ ملک، ہرا بشخ خیبرپختونخو اہ ءِ ملانے اونا احساب ءِ ایتے۔ ایف این سی نا بشخ بندی 804 آ خلنگ کن ملیپک ، بندی نمبر 804 دا غٹ آن رہامفک، پی ٹی آئی کے پی ناالس ءِ مشکلات آتیٹی شاغنگ ءِ، بندی نمبر 804 ءِ مقدمہ غاتون مون تروئی مریک۔ میڈیا تون گپ وتران کرسا گورنر خیبرپختونخوا فیصل کریم کنڈی پارے کہ تیراہ زہمی خاہوت آتا کمک کن ڈسٹری بیوشن سینٹر جوڑ ءِ و 500خاہوت آتیٹی راشن بشخنگانے ، صوبائی حکومت نا آپریشن نا بابت بیانک الس اٹی خوف تالان کریر۔ گورنر وضاحت کرسا پارےکہ خیبرپختونخوا ٹی ہچ ءُ فوجی آپریشن اس مفننگ ءِ، انٹیلی جنس بیسڈ آپریشن بیرہ امن وایمنی کن مریک،یخ آتیٹی ہمپنگ معمول ناعمل ءِ ، 60 درسد خاہوت آتا موسمی مائیگریشن ءِ۔ اوپارے کہ صوبائی حکومت نا بیان تا سوب مخلوق بے سوب اُراتیان پیش تمنگ آ بیوس مسنے، زہمی بندغ آتے عارضی بے اُرا بندغ ہم پاننگ مفک۔ صوبائی حکومت دمدستی وڑاٹ جتا 4 ارب روپئی نا بشخنگ نا بناءِ کیک۔ اوپارے کہ ای خیبرپختونخوا حکومت آن خواست کیوہ کہ او بنجاتون تولے، دلیل اتون ہیت کے، تینا کیس ءِ بنجانا مون آ تخک تو پیسہ ہم ملک ۔