بنجائی وزیر حوالکاری عطاء اللہ تارڑ نا راولپنڈی اسلام آباد یونین آف جرنلسٹس (آرآئی یوجے) نا پوسکن گچین مروک آ عہدیدار آتے مبارکباد

اسلام آباد۔ 28 جنوری (اے پی پی) بنجائی وزیر حوالکاری و شینکاری عطاء اللہ تارڑ راولپنڈی اسلام آباد یونین آف جرنلسٹس (آرآئی یوجے) نا پوسکن گچین مروک آ عہدیدار آتے مبارکبادی تسنے۔ چارشنبے نادے آ تینا تہنیتی بیان اٹی بنجائی وزیر آصف بشیر چوہدری ءِ صدر، بشیر عثمانی ءِ جنرل سیکرٹری، اظہار خان نیازی ءِ فنانس سیکرٹری ، توصیف عباسی و رشید مکل ءِ نائب صدر وخت اس کہ راجہ عمران جنجوعہ و رانا فرحان اسلم ءِ جوائنٹ سیکرٹریز گچین مننگ آمبارکبادی تسنے۔ بنجائی وزیر حوالکاری پوسکن گچین مروک آ مجلس عاملہ نا باسک آتے ہم مبارکبادی تس۔ داوخت آ او پارےکہ حکومت آجوئی  درشانی و آجوئی صحافت نا رکھ اکن سنبرینگوک ءِ۔ اوپارے کہ صحافتی تنظیمک جمہوری قدر انا مون آ دننگ و آجوئی صحافت نا رکھ اٹی اہم ءُ کڑد اس اداکیرہ۔ اوپارے کہ صحافی برادری نا راجی آسودہی، کسبی لائخی تا مون آ دننگ و ویل آتا ایسری کن ہرممکن کمکاری ءِ برجاتخنگک۔ اودااومیت نا درشانی ءِ کرے کہ آرآئی یوجے نا پوسکن گچین مروک آ سرکڑدہ غاک صحافی تا حق انا رکھ و تنظیم ءِ سوگو جوڑ کننگ کن گچین ءُ کڑد اس ادا کیرہ۔ بنجائی وزیر حوالکاری پوسکن گچین مروک آ عہدیدار آتیکن نیک است خواہی نا درشانی ءِ ہم کرے۔