حکومت آجو زرگزران نا سوگوی، مالی پائیداری و مسابقت آ تالان شونداری ونمو کن گام گیج کننگ ءِ، بنجائی وزیر خزانہ محمد اورنگزیب نا جرمن سفیر تون اوڑدہی ٹی گپ وتران

اسلام آباد۔ 28 جنوری (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ حکومت آجو زرگزران نا سوگوی ، مالی پائیداری و مسابقت آ تالان شونداری ونمو کن گام گیج کننگ ءِ، خراج تون اوار کیہی بشخ آتیٹی پنجرجاتی اصلاحات نا پروگرام آ عملدرآمد مننگ ءِ۔ اوداہیت ءِ چارشنبے نادے آ داڑے جرمنی نا پاکستان اٹی سفیر انالیپل تون اوڑدہی ٹی پارے، اوڑدہی ٹی پاکستان و جرمنی نا نیام اٹ زرگزرانی تعلقداری نا جم حالیت آتاجاچ ءِ ہلنگا و واپار، زرکاری و شونداری نا بشخ آتیٹی ہڑتوم آ کنڈآتا کمکاری ءِ پین سوگو کننگ کن پدریسہ رابطہ غاتا اہمیت آ زورشاغنگا۔ فریق آک زرگزرانی رابطہ غاتے پین گہرا کننگ و مریس مدی شونداری کن کمکارسوگو، شفاف و قابل پیش گوئی کاروباری چاگڑدنا مون آ دننگ کن تینا اسیجائی عزم انا درشانی ءِ کریر۔ وزیر خزانہ حکومت نا جم زرگزرانی وژن و اصلاحات نا بابت اولیت آتیان معلومدار کرسا آجو زرگزران نا سوگوی ، مالی پائیداری و مسابقت آ تالان شونداری نا اہمیت ءِ تالان کرے۔ اوزرگزرانی بحالی نا مخ تفی، برآمدی لائخی ٹی ودکی و پیشن نا لوڈو تا مقابلہ ٹی زرگزران نا سوگوی کن برجاگام گیج آتیا تینا خیال آتا درشانی ءِ کرسا جوان و پائیدار شونداری ءِ پک کننگ کن پنجرجاتی اصلاحات نا رفتار برقرار تخنگ آ ہم زور شاغا۔ اوڑدہی ٹی حکومت نا محصولات و خراج اصلاحات نا ایجنڈا غا ہم سرجمی اٹ گپ وتران مس ہراٹی خراج نیٹ ءِ ودفنگ، خراج تعمیل ءِ گچین کننگ و ٹیکنالوجی وڈیٹا غا تالان نظام نا کمک اٹ کارکڑد اٹی ودکی آ زور شاغنگا۔ وزیرخزانہ پیدوار کرے کہ دا اصلاحات شفافیت و انصاف ءِ مون آ دننگ، زرگزرانی بگاڑ ءِ کم کننگ و غٹ زرگزرانی فریق آتیکن اسہ وڑ وارخواہی فراوان کننگ کن جوڑ کننگانے، داڑتون اوار ہی زرکاری و دستاویزی زرگزران نا است بڈی ہم اونا اہم مسخت ءِ۔ جرمن سفیر برجا اصلاحاتی گام گیج آتا خیرمقدم ءِ کرے و کاروباری برادری تون مروک آ اوڑدہی تے مون آ تخسا عمومی مشاہدات نا تبادلہ کرے ہراٹی پالیسی تا وضاحت، تسلسل و شریدار و سرکاری ادارہ غاتا نیام اٹ گچین گپ وتران نا اہمیت آ زور شاغنگا۔