وزیراعظم محمد شہبا زشریف تون گیٹس فاؤنڈیشن نا صدر جہانی شونداری کرس ایلیاس نا اوڑدہی، وزیراعظم نا پولیو نا چٹفنگ کن شریدار آتا کمکاری اٹ گام گیج آتے برجاتخنگ نا عزم انا درشان

اسلام آباد۔ 28 جنوری (اے پی پی) وزیراعظم محمد شہباز شریف پولیو نا انسداد کن شریدار آتا کمکاری اٹ گام گیج آتے برجاتخنگ نا عزم انا درشانی ءِ کرسا پارینے کہ حکومت پولیو نا چٹفنگ کن جوان حکمت عملی و گچین ٹیم اتون عملی گام گیج کننگ اٹی ءِ۔ وزیراعظم داخیال آتا درشانی ءِ گیٹس فاؤنڈیشن نا صدر جہانی شونداری کرس ایلیاس تون گپ وتران کرساکرے ہرا چارشنبے نادے آ داڑے ڈل اتون اوار وزیراعظم تون اوڑدہی کرے۔ ڈل اٹی گیٹس فاؤنڈیشن نا صدر جہانی شونداری کرس ایلیاس آن بیدس ڈائریکٹر پولیو ڈاکٹر کیتھی نیوزیل و ڈپٹی ڈائریکٹر پولیو مائیکل گالوے اوار ئسر، ہرا بنجائی وزیر ڈٹ بندی وشونداری احسن اقبال ، بنجائی وزیر جان جوڑی سید مصطفیٰ کمال ، وزیراعظم نا فوکل پرسن پولیو تور عائشہ رضافاروق و ایلو سرکاری عہدیدار آک ہم اوڑدہی ٹی ساڑی ئسر۔ وزیراعظم آفس نا میڈیا ونگ انا کنڈآن جاری بیان نا رداٹ وزیر اعظم پارے کہ پاکستان اٹ پولیو نا پورو توننگ اسکان بل گیٹس فاؤنڈیشن کون آ پت انا قابل شریدار آتا کمک اٹ گام گیج آتے برجاتخنگک۔ اوپاکستان آن پولیو نا توننگ کن بل گیٹس نا قدر انا قابل خذمت آتا ستاءِ کرسا پاکستان آن پولیو نا توننگ کن بل گیٹس و سعودی عرب تون اوار ایلم مسلم ملک آتا کمکاری نا منت واری ءِ ہرفے ۔ وزیراعظم پارے کہ حکومت جوان حکمت عملی و گچین ٹیم اتون عملی گام گیج کننگ ءِ و پولیو نا پورو چٹفنگ کن سنبرینگوک ءِ۔ اوپارے کہ داناجوڑی نا برخلاف برجاجنگ اٹی خاطرخواہ سرسہبی آن پد ہم ہلہلہ ئی بنداوتیا پین گام گیج المی ءِ۔ وزیراعظم پارے کہ بنجائی حکومت گچین حکمت عملی نا رداٹ ملک اناطول و عرض اٹی پولیو ٹیم تا رسینگ ءِ ممکن کننگ کن صوبہ غاتون پورو ہم گرنچی اتون کاریم کننگ ءِ، ملک اٹی پولیو تور انا مہم نا پبلک سیکٹر ڈویلپمنٹ پروگرام نا رداٹ تعلقدار ڈٹ آتے برجاتخنگک۔ وزیراعظم پولیو تور آن بابت السی آگاہی و ویکسین نا فراوانی کن بنجائی وزارت جان جوڑی ءِ غٹ تعلقدار ادارہ غاتون اواری اٹ سلاہ و سوج مرتب کننگ ناپارت کرے۔ گیٹس فاؤنڈیشن نا صدر جہانی شونداری کرس ایلیاس پارے کہ گیٹس فاؤنڈیشن وزیراعظم پاکستان نا پولیو تور آ جندی چکار و دارداٹ کروک آ گچین عملی گام گیج آتے بھاز قدر انا نظراٹ ہرک۔ پاکستان پولیو نا پورو چٹفنگ کن گچین گام گیج کننگ ءِ ہرا سرسہبی نا کنڈآ ہِننگ ءِ۔ اوپارے کہ پاکستان اٹ بنجائی و صوبائی حکومت و تعلقدار ادارہ غاتون پولیو آ تعمیری سلابت برجاسلک۔ پاکستان اٹ پولیو دین انا چاگڑدی ساڑی گری نا چٹفنگ و غٹ علاقہ غاتیٹی پولیو ٹیم انا رسینگ نا رداٹ گچین گام گیج کننگانے ہرا ستاکڑزک۔ کرس ایلیاس پاکستان اٹ سرسہبی اٹ برجا پولیو تور مہم آ پورو پت انا درشانی ءِ کرسا وزیراعظم پاکستان ءِ بل گیٹس نا کنڈآن نیک است خواہی تا کلہو ءِ ہم سرکرے۔ اودااومیت نا درشانی ءِ کرے کہ برجاگام گیج آتے ٹی پاکستان زوت دا ناجوڑی نا پورو چٹفنگ نا مزل ءِ دوئی کیک۔ داوخت آ بنجائی وزیر ڈٹ بندی و شونداری احسن اقبال پولیو تور اکن برجاپبلک سیکٹر ڈویلپمنٹ نا رداٹ گام گیج آتیان ڈل ءِ معلومدار کرے۔ بنجائی وزیر جان جوڑی سید مصطفیٰ کمال وزیراعظم نا راہشونی و بل گیٹس انا ٹیم انا کمکاری نا منت واری ءِ ہرفسا گام گیج آتے پین گچین وڑاٹ برجاتخنگ نا عزم انا درشانی ءِ کرے۔ وزیراعظم نا فوکل پرسن پولیوتور عائشہ رضافاروق ہم اوڑدہی ٹی پولیو تور نا رداٹ غٹ صوبہ و شارتیٹی برجا گام گیج آتیان ڈل ءِ معلومدار کرے۔ وزیراعظم ڈل اٹی اوار گیٹس فاؤنڈیشن نا ڈائریکٹر پولیو ڈاکٹر کیتھی نیوزیل ءِ اونا ساڑی آ تقرری آ مبارکبادی ترسا اوڑکن نیک است خواہی نا درشانی ءِ کرے۔